“Venezuela ta e pais mas violento di America Latino, reportando 16.506 persona cu morto violento na 2019. Tin 60,3 morto violento pa cada 100. 000 habitante.” Asina e sociologo Roberto Briceño Leon, director di Observatorio Venezolano di Violencia, a informa den conferencia di prensa efectua na Caracas.
Di e cifra aki tin 6. 538 homicidio cometi pa e criminalidad comun loke ta representa 24 victima pa cada 100.000 habitante. Tin 5.282 morto pa “resistencia contra autoridad mientras nos ta detecta cu den e casonan ey exceso di funcionario policial di FAES. Esaki ta representa 19 morto pa cada 100.000 habitante,” Briceño Leon a bisa. Di e cifra global, 4.632 homicidio ta sin aclaracion lo cual ta indica cu 17 victima di cada 100.000 habitante ta den e categoria aki.
E investigador ta recorda cu gobierno Bolivariano tin 16 aña ta nenga di duna informacion oficial encuanto cifra di morto violento: “Na Venezuela tin un maneho scur di datonan criminal,” Briceño Leon a conclui.“ Ademas el a observa cu Venezuela ta hundi den e crisis humanitario mas grave di historia di e region. “2019 ta termina cu un economia destrui, un creciente inseguridad social y e desigualdad mas grandi, e ta algo nunca visto. E factornan aki ta fomenta violencia criminal,” Briceño a conta, ademas di conclui cu segun nan informe, na seis estado y 175 municipio di e pais tabatin mas morto na man di polis cu di delincuente.
Di acuerdo cu e estudio, Venezuela incluso a yega na “exporta” delincuencia pa resto di e region, mas tanto na e paisnan den sur di e continente. Otro paisnan manera El Salvador tabatin na 2019 un cifra di 48 homicidio pa cada 100.000 habitante, Jamaica 47, Brasil 40, Honduras 32, Colombia 25 y Mexico 22 homicidio pa cada 100.000 habitante.
