(lapatilla.com/Univision) – Den un solo siman na januari, 10.000 empleado di e empresa petrolero estatal PDVSA lo a tuma retiro. Despues di e collapse den produccion di crudo, di como un miyon bari pa dia den un aña di tempo (2016 – 2017), ta surgi awor otro situacion critico pa e empresa, cu ta e exodo masal di empleado capaz y cu experiencia. Loke tabata parce impensabel un par di aña pasa, awor ta sosodiendo: e trahadonan di e poderoso empresa estatal ta protesta cu wea den man contra gobierno di Nicolas Maduro y dentro di e propio oficinanan di e empresa. Pero ademas di e reclamonan, nan ta renunciando na un ritmo acelera, lagando e industria sin personal cualifica.
PDVSA actualmente ta produci 1,6 miyon bari pa dia di crudo, e nivel mas abao di ultimo 30 aña y ni sombra di e mas di 3 miyon bari cu e empresa tabata produci na momento cu Hugo Chavez a yega na poder na 1999. E situacion di e empresa a empeora cu e exodo masal di empleado, cansa di warda riba mehoracion di salario y cu miedo di un accidente laboral, pa falta di mantencion di e instalacionnan. E salida di empleado tabata asina fuerte cu e gerencia a dicidi di no ricibi mas carta di renuncia. Di acuerdo cu e secretario general di e Sindicato di Trahadonan Petrolero y di Gas di estado Falcon, Ivan Freites, durante prome siman di januari so, a renuncia como 10.000 empleado di Pdvsa. Esaki lo ta 7% di e payroll total, cu te cu augustus 2016 tabata conta cu 143.000 empleado. Aunke sr. Freites ta denuncia cu como 31.000 di nan ta parti di un payroll paralelo, cu regimen Chavista a impone riba e empresa. “Prome biaha cu e situacion aki ta sucede den un empresa di e categoria aki.
E trahadornan ya no ta importa nan si ta paga nan cesantia of no. Nunca antes a yega di mira pensionadonan ta protesta na porta di e empresa. E principal causa di e salida masal aki ta cu nos a perde salario, un trahado cu no por cumpra ni un webo cu su salario, ta un esclavo,” sr. Freites a declara na Univision.
E problema cardinal cu sr. Freites ta señala ta cu e empleadonan paga na bolivar a mira nan salario, pa un empleado cu 25 aña di experiencia, baha te na ekivalente di cuatro dollar pa luna. Mientras cu un empleado di un compania contratista di PDVSA tin sueldo di entre 5.000 pa 15.000 dollar pa luna. “Esaki ta loke nos ta reclamando. Igualdad. Igual trabao, igual salario.”
