Venezolanonan ta pasa basta problema pa drenta Aruba of cualkier otro pais

Actualmente hopi ta e turista Venezolano cu ta wordo perhudica pa e situacion na Venezuela caminda cu situacion financiero ta hopi malo. For di fuentenan confiabel a sali e informacion cu pa un turista drenta Aruba e mester tin un suma di 150 dollar pa anochi cual ta haci nan posibilidad di biaha mas dificil. Mirando cu esaki ta un suma halto pa nan, pero ta e realidad di bida pa por drumi, come y keiro na Aruba.

Hopi Venezolano ta wordo manda bek nan pais y cu segun informacionnan ricibi di e turista Venezolano, nan  ta wordo maltrata verbalmente pa oficialnan di inmigracion cu ta bisa nan cu aki nan cupo di CADIVI no tin balor.  Opinion riba red social ta mustra cu e trato ey no ta necesario y no ta na su luga.

Nos tur sa cu tin hopi di e hendenan aki cu ta biaha pa Aruba cu intencion di keda traha den cualkier Chines y hasta ta ofrece pa haci tur tipo di trabou pa asina por mantene nan mes y nan famia. Ultimo tempo nos por wak hopi di e Venezolanonan ta cana rond den tur bario, caminda cu nan ta busca trabou. Tin di esunnan cu ta bin pa pasa carchi pero esaki no ta bale la pena mas debi na e cambio cu no ta suficiente, actualmente e dollar ta para na 650 Bs pa 1 dollar y riba mercado preto nan ta paga 950 Bs. Pa 1 dollar. Mirando e porcentahe cu nan tin cu paga aki na esun cu ta pasa e carchi ( esun cu ta raspa ) ta entre 25% pa 30% y esaki ta pone cu e no ta cumbini nan mas pa raspa carchi.

Esaki tambe ta haci un caida pa cierto comerciantenan cu tabata haci e tipo di transaccion aki. E parti mas malo ta cu e turista mes cu ta bin cu reservacion pa hotel tambe mester pasa den e trauma aki. Hopi biaha esun cu si tin placa ta haya un impresion robes di nos pais pa motibo di un trato malo cu ta basa riba generalisacion. No tin distincion un ta paga pa tur y hopi biaha tin miembronan di inmigracion cu un actitud hopi negativo pa cu e turista Venezolano. Hasta tin di e turistanan aki cu pa prome biaha ta yega Aruba y nan ta wordo menasa cu si nos haya bo ta traha lo bo no drenta Aruba nunca mas y esaki ta prome impresion cu ta duna un turista cu ta bin cu su reservacion na un hotel cu segun nos ta 5 strea.

No por hustifica esunnan cu ta bin haci malo na nos pais pero mester ta hopi cauteloso cu generalisa y trata cualkier hende di forma inhumano. Esey no ta necesario.