ORANJESTAD – E anuncio cu Banco Central di Aruba (BCA) a haci contra e companianan of personanan cu ta ofreciendo e servicio di transferencia di placa pa exterior di un forma ilegal, no a cay den bon tera cerca e hendenan cu ta haciendo uzo di e tipo di servicio aki.

Mas tanto e ciudadanonan Venezolano ta haciendo uzo di e tipo di servicio ilegal aki. Esaki debi na e situacion di caos cu nan pais ta pasando aden. Ademas, nan no ta hayando un bon servicio for di e companianan di transferencia di placa registra na BCA.

Bon Dia Aruba a consulta varios persona cu ta haciendo uzo di e servicio di transferencia di placa for di hendenan cu no ta registra na BCA. Nan ta haya cu e anuncio di BCA ta contribui pa e situacionnan di nan famia of ser keri lo por bira mas pio y mas inhumano na Venezuela. Nan ta haya cu BCA ta purba di kibra e cadena di ayudo humanitario aki. Nan ta manda placa pa asina nan famia na Venezuela por abastece di cuminda y medicina den mercado preto, unda nan mester paga un prijs altisimo debi na escasez y inflacion. E personanan consulta a preferi di keda den condicion anonimo.

Control
BCA ta e instancia cu –segun ordenansa nacional– ta responsabel pa supervision y registracion di companianan di transferencia di placa. Companianan aki, algun di nan internacional, a bin establece na Aruba debi na e comunidad grandi di stranhero cu a bin traha na Aruba. Nan ta manda divisa como ayudo pa nan famia den nan pais di origen.

BCA su anuncio pa esunnan cu ta haci e tipo di practica monetario aki tabata uno cla den medio di prensa. Solamente institutonan of persona registra como compania de transferencia di placa ta permiti pa haci esaki, segun nos ordenansa nacional. Mientras nan ta adverti cu esunnan cu ta brindando e tipo di servicio aki sin e registracion rekeri, mester anula nan operacion inmediatamente. Sino e ta wordo considera un violacion di e ley cu ta regarda e tipo di operacion aki. E ley aki tin un castigo maximo di 6 aña di prizon of un multa pa esunnan cu ta realisando e practica monetario aki di forma ilegal.

Situacion interno na Venezuela
E personanan consulta ta argumenta cu nan ta bin haciendo uzo di personanan cu ta ofrece e servicio di transferencia di placa pa Venezuela sin cu nan ta registra na BCA, debi cu e instancianan cu si ta registra no ta ofrece e servicio aki di forma regular.

Un motibo tin di haber cu e situacion di instabilidad di e moneda Venezolano cu ta cambia constantemente, compara cu e dollar. Igualmente, e situacion interno na Venezuela mes ta haci cu empresanan of compania di transferencia di placa –cu ta esun di encarga ya sea di deposita of entrega e placa– no por opera debi na e situacion di insiguridad.

E situacion a bira mas dificil pa e Venezolano estableci na Aruba por manda placa pa yuda nan famia via e companianan legal di transferencia di placa. Esaki debi cu constantemente gran parti di Venezuela ta sin coriente. Bon Dia Aruba a bishita un di e companianan di transferencia di placa registra na BCA pa wak si nan ta opera normalmente pa Venezuela. E contesta tabata uno directo: “No señor! No por ofrece e servicio aki debi cu no tin coriente na Venezuela!”

E hendenan Venezolano consulta ta consciente cu e tipo di operacion aki ta uno prohibi pa ley y cu BCA tin cu haci su trabou, pero nan no por yuda. Te hasta nan mester di e servicio di e personanan cu ta opera ilegal pa manda placa na Venezuela, ya cu di nan ayudo economico ta depende cu nan famia por sobrevivi.

Ademas, e hendenan aki ta ofrece un servicio ‘eficiente y responsabel’, asina un persona consulta a declara na e matutino aki. “E bon di nan ta cu e placa ta yega casi inmediatamente. Mi ta manda regularmente placa pa mi famia por cumpra cos di come. Mi ta entrega e placa akinan y den menos cu 15 minuut, mi famia ta haya e placa deposita den nan cuenta di banco na Maracaibo,” el a bisa.

Otro persona a relata cu te hasta tin hende cu ta ofrece e servicio di busca e placa na nan cas mes, sin costo adicional. Asina nan por spaar gasolin y tempo, sin mester sinta of para den rij pa manda placa. “Nan ta persona serio y responsabel! Nan ta core e risico cu e otro companianan legal no kier core! Nan t’ey pasobra nan ta ofrece un servicio cu nos mester di dje!”, asina un persona consulta a bisa.

Tin algun cu ta cobra 10 florin como tarifa pa cualkier suma transferi pa Venezuela. Otronan no ta cobra tarifa, nan ganashi ta bin for di e cambio di e divisa di dollar pa Bolivar Soberano. E cambio aki no ta wordo paga nunca a base di e prijs oficial dollar/Bolivar Soberano. Ayera algun di e personanan cu ta ofrece e tipo di servicio aki tabata paga entre 3.200 y 3.350 Bolivar Soberano na Venezuela pa dollar y/of florin entrega na Aruba. Mientras cu e prijs di un dollar tabata 4020 Bolivar Soberano, segun e website Dollar Today.