(El Nacional) – E organisacion no gubernamental Monitor Ciudad diahuebs ultimo a denuncia cu Venezolanonan ta gasta casi cinco salario minimo mensual pa por haya awa potabel na nan cas, esaki debi na deficiencianan di e servicio na henter e pais.
Durante un foro titula “Agua en Caracas”, e ONG a propone pa mehora den gran medida e servicio di awa na e pais y permiti un participacion importante di sector priva.
Jesus Armas, director general di e organisacion aki, a destaca e falta di transparencia den e maneho di fondonan publico destina na e servicio publico aki.
“Ciudadanonan mester inverti un promedio di hasta cinco salario minimo mensual pa por satisface nan necesidad cu e tema di awa potabel y ademas tin un privatisacion di e servicio publico aki,” e ingeniero a destaca.
Armas a plantia e necesidad di un participacion mayor di sector priva, mediante asociacionnan cu empresanan hidrologica di e pais. “Dependiendo di e realidad di cada region, mester tin un transformacion di e modelo di gobernansa, pero sin duda nos ta bay tin mester di e participacion di e sector priva pa por recupera e acuaductonan di nos pais y bolbe hiba awa back na casnan di e Venezolanonan,” el a sigura.
Na Area Metropolitano di Caracas e ciudadanonan ta pasa 65% di nan tempo sin awa. Kiermen di 168 ora cu un siman tin, awa ta yega rond di 60 ora so, manera e ONG aki a indica.
Jesus Vasquez, gerente di dato di Monitor Ciudad, a señala cu tin sector di e pais cu ta completamente desconecta di e servicio aki, loke ta laga nan den un posicion mas vulnerabel.
El a splica cu, segun estudionan cu nan ta maneha, e estadonan mas complica ta Amazonas, Zulia y Carabobo, na unda ciudadanonan ta pasa mas di 60% di nan tempo sin awa.
