ORANJESTAD – Den dianan aki, Aruba tin basta atencion pa loke ta sucediendo na e pais bisiña Venezuela; comunidad internacional a duna su apoyo na e presidente interino, Juan Guaido. Hulanda a duna su reconocimento, pero te ainda nan ta sigui cu e relacion diplomatico cu e gobierno di Nicolas Maduro. Esaki pa dentro di e tempo stipula den constitucion Venezolano organisa eleccion liber y transparente, segun e normanan internacional.

Bon Dia Aruba a haci entrevista cu varios Venezolano cu ta bibando na Aruba, y nan a comparti nan opinion tocante e hecho cu Hulanda y varios pais di Union Europeo a duna nan apoyo na Juan Guaido, tambe cu algun otro luga lo bay ta centro di recoleccion di ayudo humanitario prome cu e material drenta Venezuela. Di parti di Colombia y Brasil, ya a aproba e asistencia aki pa e ayudo humanitario cu Merca ta manda pa Venezuela. E otro punto di recoleccion lo ta un isla, segun Guaido, y e pensamento ta bay den direccion di Corsou of Aruba, sin cu tin confirmacion algun di esaki pa banda di e autoridadnan na e islanan.

Sr. Hernandez a splica cu e ta sigur cu ni Corsou ni Aruba lo duna nan apoyo pa Venezuela na e momentonan aki, pa motibo cu, manera el a bisa, “Aruba ta depende hopi di Venezuela”. “Si Maduro cay manera mester ta, Venezuela lo ta habri atrobe pa inversionnan stranhero, mi lo bay Venezuela di biaha pa mi inverti den mi pais.”

Otro di e persona cu Bon Dia Aruba a entrevista, pero cu no kier a duna su nomber, a bisa: “Loke ami ta wardando ta e veredicto cu mester duna pa Maduro por bay for di Venezuela. Ami ta na Aruba desde aña 2006, mi tin dolor cu mi hendenan eynan cu no tin cuminda, cu nan no por cumpra sikiera un hariña pan. Mi ta spera cu e situacion aki lo cambia pronto, pa motibo cu si Venezuela bira un pais miho, mi lo saca mi placa di akinan y mi lo bay bek pa inverti den mi negoshi.”

Enrique Palacios a comenta cu e no kier pa Merca interveni na Venezuela cu tropa militar, pa motibo cu esey lo por trece hopi problema. “Lo por crea un guera manera Siria of Irak, bay wak con nan ta awo, tur destrui.” El a agrega tocante e intervencion internacional diplomatico: “Mi ta pensa cu un dialogo via di Papa Francisco tambe lo por ta posibel. Papa ta hopi preocupa pa Venezuela.” Di e mesun forma, el a agrega cu e no ta di acuerdo cu otro paisnan ta interveni na Venezuela, ‘ya nos tin un presidente caba, cu nos a dicidi pa e keda un biaha mas, ban dun’e un tiki tempo mas pa e por haci su trabou’.

Mirando cu ningun di e personanan entrevista pa e relato aki kier a saca nan potret, y algun di nan a preferi di keda anonimo, nos por nota toch un cierto cautela entre Venezolanonan. Por ta cu nan tin un tiki miedo di expresa libremente, mirando e situacion politico delicado na e pais, na unda te awo no tin claridad pa locual ta trata e liderazgo di e pais, y e direccion cu e ta bayendo.

Sinembargo, a resalta e hecho cu e Venezolanonan entrevista ta mirando pa bolbe nan pais, locual ta indica cu nan ta mira nan estadia como algo temporal, y nan deseo di contribui na reconstruccion di Venezuela ta fuerte. Ademas, por a nota cu, igual na Venezolanonan riba rednan social, e Venezolanonan na Aruba ta mira cu desconfiansa un intervencion militar, preferiendo pa libera nan mes pa medionan mas pacifico.