(AP) — Venezolanonan a bira e nacionalidad cu mayor cantidad di aresto pa a crusa e frontera Mericano ilegalmente, reemplasando e Mexicanonan pa prome biaha den historia, segun cifranan publica diasabra cu ta mustra cu september tabata e luna cu e di dos cantidad mas grandi di aresto di tur nacionalidad.
Patruya di frontera a aresta Venezolanonan 54,833 biaha despues cu nan a drenta for di Mexico na september, mas cu dobel e cantidad di 22,090 na augustus y hopi mas cu e record mensual di 33,749 aresto na september 2022.
Aresto di tur nacionalidad drentando for di Mexico a alcansa 281,763 na september, un aumento di 21 porciento riba 181,084 na augustus y alcansando e nivel record di 222,018 na december 2022, segun Aduana y Proteccion di Frontera Mericano. Aresto pa aña presupuestario di gobierno cu a caba dia 30 di september a surpasa 2 miyon pa segundo aña consecutivo, un reduccion di 7% for di e record di mas di 2.2 miyon aresto den e mesun periodo un aña prome.
Venezuela a cay den un crisis politico, economico y humanitario durante ultimo decada, pushando mas di 7 miyon persona pa bandona nan pais. Inicialmente nan a keda na paisnan cercano na Latino America, pero a cuminsa yega Merca den ultimo tres aña, kedando na New York, Chicago y otro ciudadnan mayor.
Administracion di Biden recientemente a anuncia un status legal temporal pa casi 500mil Venezolano cu ya tabata na Merca dia 31 di juli, mientras a priminti di deporta esnan cu yega ilegalmente despues di e fecha en cuestion y no ricibi asilo. Recientemente a cuminsa vuelonan di deportacion na Venezuela como parti di un acercamento diplomatico cu gobierno di Nicolas Maduro.
Pa decadas, Mexicanonan tabata conta pa e gran mayoria di crusamento ilegal di frontera, pero e fluhonan a caminda durante ultimo decada na Centro Americanonan y mas recientemente, for di Sur America, Africa y Asia. A aresta Mexicanonan 39,733 biaha crusando e frontera na september, hopi menos cu e Venezolanonan. Guatemalteco, Hondureño y Colombiano a completa e top 5.
Administracion di Biden a propone como $14 biyon pa e frontera den un pakete di gasto di $106 biyon anuncia diabierna, y a insisti cu cualkier solucion a largo plaso ta rekeri ayudo di Congreso.
E administracion a adopta un maneho “carrot and stick” di avenidanan legal nobo pa busca asilo cu restriccion pa esnan cu no cumpli cune.
Como 43mil migrante a drenta e pais via terestre cu Mexico na september, usando un app mobil yama CBP One, treciendo e total na casi 278mil desde cu e sistema di cita online a cuminsa na januari.
Ademas, mas cu 265mil persona di Cuba, Haiti, Nicaragua y Venezuela a drenta na september na airportnan prome cu aplica online cu sponsor financiero. Incluyendo e avenidanan legal aki, e cantidad di crusamento a alcansa un nivel record mensual di 269,735 den september y un record den aña presupuestario di casi 2.5 miyon.
