Mientras un crisis humanitario ta tumando luga na nos pais bisiña, keto bay pa por haya paspoort Venezolano ta birando dia pa dia mas dificil. Esaki ta afecta tambe residentenan Venezolano na nos pais.

Manera nos a publica den pasado, pa hopi ciudadano Venezolano ta casi imposibel pa renoba nan paspoort. E prome indicacionnan a drenta ora nos a publica luna pasa e storia di e hoben Arubano David Carache kende su famia di descendencia Venezolano tabatin problema pa haya nan paspoort. Loke sr. Carache a conta nos e tempo ey tabata cu su famia a warda pa mas cu un aña pa nan documentonan di biahe cu nunca a yega pa via di ‘falta di material’ segun e representacion di Venezuela na Aruba a conta nan.

Pues ta birando practica normal cu no ta sacando mas paspoortnan, segun sr. Carache a conta nos ultimo. Pa por renoba esaki por pone un tipo di sticker na e paspoort venci cu nan ta yama un ‘proroga’ y cu esaki e paspoort ta keda extendi cu 2 aña mas. Pero e gastonan relaciona cu esaki ta mas cu un paspoort nobo. Por ehempel na Consulado General di Venezuela aki na Aruba segun e hoben, e prijs ta 90$ pa un paspoort nobo mientras e ta 180$ pa un proroga.

Pero despues di puntra personanan cu tin pensa di extende nan paspoort pronto, nos a bin ta haya sa cu actualmente e prijs pa e extension aki a subi na 280 dollar Mericano. No ta conoci dicon e prijs a subi drasticamente. Nos no a haya ningun comentario oficial di representacion di Venezuela na Aruba.

‘Negoshi miyonario cu paspoort’

Un articulo cu nos a publica luna pasa di fuente El Pais na Spaña a indica cu e exodo di Venezolano ta un negoshi di miyones pa e rednan di funcionario cu ta comercialisa e asunto di paspoort pa miles di dollar.

Esaki ta algo cu e ex funcionario di Saime (Servicio Administrativo di Identificacion, Migracion y Stranheria) Julián Quiara a declara na e corant despues di pidi asilo na Spaña pa via cu el a haya menasanan di su superiornan ora e no kier a colabora den e benta di documentonan di identidad.

Segun El Pais hopi ciudadano tin mas di un aña ta warda riba un paspoort via e caminda oficial. Pero esunnan cu por y ta desea di paga miles di dollar na e funcionarionan corupto di Saime ta haya nan documentonan rapidamente, segun victima, funcionario y ex funcionarionan di gobierno Venezolano y intermediarionan di e trafico ilegal aki.

Situacion na Aruba

Esaki ta algo cu ta afecta residentenan Venezolano na Aruba tambe. Varios persona a acerca nos redaccion pa asina expresa nan preocupacionnan pa loke ta trata obtencion di un renobacion riba nan documentonan di biahe. Un persona cu a bin dilanti ta Rina Hernandez kende a conta Bon Dia cu pa e por haya un extension di su documentonan pa un periodo di 2 aña via e ‘proroga’ pa e y su yiu lo mester paga un total di 560$ dollar.

Segun sra. Hernandez e consulado a splik’e cu e tramite tambe ta posibel na Venezuela (unda e gastonan ta hopi menos), pues e tin pensa di haci esaki na nos pais bisiña. Esaki mirando cu pa haci e tramite na Venezuela tin gastonan relaciona di 560 mil Bolívares, cual ta mas o menos 3 dollar riba cambio di mercado negro. Sra. Hernandez no tin miedo di bay Venezuela pa haci un simpel tramite, el a conta nos.

Manera ta conoci tin un conseho negativo den efecto pa vuelonan na nos pais bisiña di parti di gobierno di Aruba y gobierno Hulandes. Sinembargo residentenan riba nos isla por drenta y sali nos pais bisiña sin problema, segun e consulado a conta sra. Hernandez. Nos lo ta treciendo declaracionnan di otro ciudadanonan Venezolano residencia riba nos isla den e proximo dianan pa asina amplia riba e situacion cu Venezolanonan ta haya nan mes den dje.