Ayera for di oranan di mainta tempran prome cu e consulta popular Venezolano a habri oficialmente, ya caba cantidad di hende di e pais bisiña aki a congrega dilanti di Cas di Cultura. Final di dia a conta 4345 voto.
Tanto Venezolanonan residencia na Aruba como turista a bay deposita voto pa duna nan opinion riba tres pregunta fundamental:
1. Ta rechasa y no ta reconoce e realisacion di un asamblea nacional constituyente proponi pa Nicolas Maduro sin e aprobacion previo di pueblo Venezolano? 4333 a vota si, 9 a vota no (nulo 3).
2. Ta demanda di Fuerza Armada Nacional Bolivariana cu nan ta obedece y defende e Constitucion di aña 1999 y ta respalda e decisionnan di Asamblea Nacional? 4328 a vota si, 12 a vota no (nulo 5).
3. Ta aproba cu ta procede cu e renobacion di ‘Poderes Publicos’ segun estableci den Constitucion, manera realisacion di eleccion y formacion di un gobierno nobo di unidad nacional? 4330 a vota si, 9 a vota no (nulo 6).
Laura Luces kende ta miembro di e grupo cu a organisa e consulta popular of ‘plebiscito’ aki na Aruba a expresa su satisfaccion pa e acogida di e actividad aki cu el a cualifica como uno ‘democratico y pacifico’. E ta laga sa cu tur cos tabata desaroya den bon ambiente y sin niun incidente. Sinembargo mirando e cantidad di hende nan a dicidi di prolonga e clausura di 4’or atardi pa mas laat pa asina tur hende por participa.
E ta conta cu alrededor di 1.500 Venezolano ta aparece den e censo electoral di Conseho Nacional Electoral (CNE) pa vota na Aruba. Sinembargo sra. Luces ta cuestiona e echo cu e Consulado di Venezuela pa aña a percura pa limita e registro di hendenan cu ta contra di e gobierno actual den e censo di CNE. E ta haya cu esaki ta un prueba ‘cu e Consulado Venezolano a viola nos derechonan politico’.
El a agrega cu berdaderamente esaki a bira un exito. “Nos ta sumamente agradecido y sorprendi di e cantidad di hendenan cu a bini pa eherce nan derecho di vota. Nan kier un Venezuela mas completo cu paz, harmonia y unda nos tur lo por biba den comunidad y como ruman.”
Observador local
Pa garantisa e transparencia di e proceso aki tabatin un grupo di observador local, mas tanto Arubianonan y no Venezolano, entre nan Alvin Arends, Edwina Henriquez; Milton Ponson y Atan Lee. Bon Dia Aruba a papia cu e observador Alvin Arends kende a elogia e forma civilisa di e proceso aki. “Mi ta wak hopi fluidez den e preparacionnan. Kiermen e ta bayendo hopi bon.”
Igualmente e parlamentario Jennifer Arends-Reyes (AVP) a haci acto di presencia pa mustra su sosten na e actividad democratico aki. E ta bisa aki cu su bishita ta pa brinda apoyo y particularmente den e parti democratico. “Mi ta kere cu esaki ta e miho manera cu bo por expresa bo mes na momento cu bo ta sinti cu un pueblo mester duna su bos.”
Ambiente
Nos por a ripara un ambiente festivo dilanti di Cas di Cultura, harmonisa cu musica di e folklore Venezolano. For di mainta te atardi e rij di hendenan tabata basta largo. Algun di nan tabatin paraplu pa protege nan mes di e solo pisa di merdia. Un di nan tabata Arnet Luque kende tin 6 aña bibando na Aruba. El a bin vota den e consulta popular aki pa expresa democraticamente su mal contra e gobierno Venezolano. “Nos kier un cambio. Nos kier un miho Venezuela. Nos kier libertad, siguridad y pa e hendenan stop di sufri di hamber”. E ta laga sa cu a pesar cu nan ta na Aruba nan ta sufri pa nan famia na Venezuela cu no tin cuminda y cu ta sufri di hamber; y nan por ta leu di Venezuela pero no ausente di dje. E tabata un funcionario di departamento di Impuesto na Venezuela, pero el a perde su trabou ‘pasobra mi a pensa diferente’.
