A traves di un video e lider opositor Venezolano Maria Corina Machado, a anuncia cu Venezolanonan cu ta bibando na varios pais rond mundo ta organisando pa un reunion mañan atardi caminda nan ta bay exigi, entre otro, respeta e mandato di eleccion primario di 22 di october ultimo unda el a gana como candidato unico di oposicion.
Den e video Machado ta pidi na su siguidonan pa exigi stop e persecucion na esnan cu ta na Venezuela luchando pa eleccionnan liber, pa e liberacion di e presonan politico, nan tambe ta exigi un fecha pa eleccion presidencial di e aña aki manera ta coresponde den e Constitucion Venezolano, ademas nan tambe ta pidi pa respeta e mandato cu nan a haya dia 22 di october ora nan a eligi un candidato unico opositor cu lo enfrenta Nicolas Maduro den e eleccion presidencial.
“Pasobra e candidato di e pueblo, ta ser eligi pa e pueblo mes y no pa Nicolas Maduro,” Machado a sigura.
Pa e motibo aki mañan diadomingo varios ciudad rond mundo ta bay uni den un solo bos pa mustra “e forsa cu ta uni nos y e amor cu nos ta sinti pa Venezuela y pa nos libertad expresa riba tur su cayanan,” Machado a bisa.
Den esaki, Aruba no lo keda afo caminda Comite Local Aruba a informa cu mañan e Plaza Simon Bolivar na Oranjestad for di 4.30 di atardi ta bay ta e punto di encuentro di esnan cu kier pa nan bos ser scucha, pa alerta comunidad internacional tocante e represion di e regimen di Maduro y exigi e respet di e boluntad popular expresa dia 22 di october ultimo.
Por recorda cu for di un siman atras, a bira conoci e desaparicion forsa di e hefenan di campaña “Comando Con Vzla” di estadonan Vargas, Yaracuy y Trujillo, 72 ora despues di nan desaparicion nan tabata priva di libertad na Palacio di Husticia di Area Metropolitano di Caracas sin e presencia di nan abogadonan y sin permiti e contact cu nan famia.
