Diadomingo awor si na ultimo ora e situacion no ta cambia lo tuma luga un votacion cu lo por nifica cambio substancial pa e futuro di e pais bisiña di Venezuela.

E ‘ora cero’ aki tin di haber cu e decision di e presidente Nicolas Maduro di convoca un votacion pa eligi un asamblea constituyente cu lo bini cu cambionan den e Carta Magna of Constitucion di Venezuela. Un medida cu segun e mandatario Venezolano lo trece stabilidad bek den e pais den caos aki. Mientras cu e criticonan ta bisa cu e reforma constitucional aki lo nifica morto di democracia pa sr. Maduro por haya un poder autoritario.

Venezolanonan na Aruba
Prome cu e ora cero aki yega, caminda no ta wordo descarta cu lo trece confrontacion, violencia y te hasta dramamento di sanger, un grupo di Venezolano na Aruba pa uni den oracion (vigilia). Un miembro di e grupo aki ta Cime Texier kende ta haci un invitacion na e comunidad di Aruba den general y muy specialmente na nan compatriotanan pa participa y uni nan den e cas parokial di Misa Birgen di Fatima na Dakota. El a bisa cu e union cu e ta pidiendo ta sin niun sorto di diferencia of pretension politico.

E ta un vigilia di cuater ora unda tur hende lo resa hunto haciendo uzo di e poder di oracion pa un solucion pacifico y sin mas dramamento di sanger na Venezuela. Aunke e ta for di 8’or anochi te cu 12’or di mey anochi, no necesariamente e persona mester keda tur e oranan ey, e organisado ta splica.

Situacion dificil
Aunke e ta un persona creyente; sra. Texier a laga sa cu nan no por cera nan wowonan na e realidad cu su pais ta bibando. El a resalta cu na Aruba hopi hende ta compronde e situacion di nan pais; y nan ta brindando ayudo di diferente forma; y un manera ta pa medio di oracion.

E situacion cada dia ta birando mas dificil na Venezuela. Tin protesta grandi tur dia, violencia, confrontacion, crisis economico y tur sorto di escasez, e ta bisa. Sra. Texier ta lamenta e ola di nan compatriotanan cu mester bandona nan propio pais obliga pa un situacion inhumano. “Esaki ta un sentimento hopi tristo, pasobra niun hende kier laga su pais, su famianan, su amigonan y su hendenan.” E ta prefera di referi na e situacion aki como cosnan negativo cu no mester sosode mas. E pueblo di Venezuela ta luchando pa loke nan ta kere y loke nan tin mester di dje, y e ta spera cu nan por logra sali bon di e situacion di incertidumbre aki. Sinembargo e ta haya cu tin hopi maldad producto di e desesperacion di ambos partido.

For di Aruba e comunidad Venezolano por a wak cu durante e ultimo lunanan e situacionnan a bira pio di loke e tabata ta antes den nan pais. Sra. Texier ta haya cu e ola di protesta di tur dia riba caya ta refleha e sentimento di e pueblo Venezolano cu ta rechasa tur cos cu no ta faborabel pa nan pais; y no pa un grupo so.

Segun e tur cos ta defini caba na Venezuela pa su pueblo cu tur dia ta protesta su mes riba caya. E ta desea cu pronto e pueblo Venezolano por uni bek sin polarisacion; pero si cu hopi amor y fraternidad, no solamente entre Venezolanonan sino tambe cu hendenan di afo.

“Ban resa pa Venezuela si nos ta stima e pais ey. Pasobra no tin otro forma.”