E conocido ciudadano y miembro di oposicion Venezolano na Aruba, Laura Luces ta haci un yamado pa e ciudadanonan Venezolano residencia na Aruba pa nan participa masivamente riba e proceso nacional di decision soberano contra cualkier cambio of reforma constitucional cu e gobierno di Presidente Nicolas Maduro kier bin cu ne.
Ta asina cu diadomingo awor for di 8’or di mainta te cu 4’or atardi, lo tuma luga un consulta popular cu e pueblo Venezolano bibando riba nos isla na Cas di Cultura. Segun sra. Luces ta e pueblo di Venezuela ta esun cu mester dicidi riba e futuro di nan pais cu ta pasando den un situacion critico na tur nivel, tanto politico, social, economico, etc..
El a bisa cu e sector democrata cu ta miembro di Asamblea Nacional, pero tambe MUD, gremionan, Iglesia, universidadnan, y otro instancia, organisacionnan y personanan natural of huridico ta bisa “no” na e regimen di e presidente Maduro. Tambe nan ta bisa no contra un reforma constitucional of Constituyente; ya cu nan ta hay’e cu e ta inconstitucional y vulnerabel pa fraude. Segun sra. Luces, e Venezolanonan mester expresa su mes bisando “no” contra di hamber, miseria, falta di remedi, insiguridad, tortura, preso politico, inflacion, kiermen “no” contra e “horor di e regimen aki” a trece cu ne.
E ta invita pa e residentenan Venezolano por participa den e consulta popular aki bisando “si” riba e tres preguntanan cu ta wordo haci door di e consulta aki. E ta haya cu di e forma aki e pueblo di Venezuela lo por dicidi riba su futuro. Tur Venezolano y stranhero nacionalisa Venezolano por participa ya sea cu nan ta bibando na Venezuela of den exterior. Nan mester a nace prome cu dia 16 di juli 1999 y nan mester ta inscribi of no den e Registro Electoral. Nan mester presenta nan ID of cedula plastifica vigente of caduca. Nan mester vota un biaha so den e sitio of “punto soberano” cu na Aruba ta Cas di Cultura.
Ya caba diadomingo ultimo –riba e mesun dia cu e lider di oposicion Leopoldo Lopez a keda libera for di prizon pa bay sigui su castigo for di cas pa motibo di salud- cantidad di hende di tur nacionalidad pero muy specialmente di Venezuela, a participa den un caminata humanitario y pacifico bou e nomber: Unidos Por Venezuela. E tabata un caminata di 10km cu a sali for di Plaza Simon Boliva cu e meta di contribui cu Cruz Berde, kendenan ta un grupo di boluntario, mayoria di nan ta studiantenan di medicina cu ta brinda asistencia y prome auxilio na esunnan cu a resulta herida den e marcha di protesta na Venezuela. Tambe nan ta yuda esunnan di mas necesidad cu no tin remedi of asistencia medico.
