Venezolanonan na Aruba den protesta atrobe

Ayera mainta un grupo di Venezolano bisti na preto a protesta dilanti Consulado General di Venezuela na Aruba. A pesar cu nan a protesta pacificamente, polis a presenta pa asina garantisa ordo publico. No ta prome biaha cu Venezolanonan bibando aki kier mustra nan solidaridad cu nan compatriotanan. Sinembargo awor nan a cuminsa atrobe mirando e protestanan na Venezuela.

Banda di 9or di mainta e  grupo a bira mas grandi y mirando cu a wordo forma dos grupo na cada cant’i caminda; polis a dicidi di mantene un grupo so no riba acera mas di e consulado Venezolano; sino ariba acera unda edificio di Dimas ta situa.

Manifestacion
Durante e manifestacion di protesta aki  tabatin automobilista cu tabata expresa nan sosten y otro nan rechaso cu e manifestacion aki. Expresion manera: “No mas Maduro!” of “Bay protesta na boso pais”, a refleha e sentimento mixto aki.

E demonstrantenan no a entrega un manifiesto na e consulado di nan pais. Nan ta  kere cu e tipo di manifestacion pacifico aki y nan silencio ta nan mayor rechaso contra nan. E grupo a protesta te cu 10’or di mainta; y den futuro nan lo sigui protesta pacificamente. Nan lo sigui protesta contra cada victima cu ta cay na Venezuela pa exigi legalmente e condena di e responsabel di e crimen nan aki, asina un manifestante a declara na Bon Dia Aruba.

E manifestacion a bay trankil solamente un señora a bira emocional  expresando su dolor contra gobierno Chavista yamando nan aliando nan como “ladron y narcotraficante”.

E manifestantenan tabata exhibi no solamente borchi contra e gobierno Chavista di  presidente Nicolas Maduro, pero tambe potretnan di e victimanan cu a muri durante e manifestacion cu  a bin tumando  luga na Venezuela durante mas cu 40 dia caba.

Un di nan, Maria Puche a bisa cu e accion aki tin di haber cu e Venezolanonan den henter mundo cu a uni pa expresa nan dolor y solidaridad cu e famianan cu a perde nan ser keri durante e dianan di protesta  riba caya  na Venezuela.

“Nan a muri victima di e gobierno nacional, ya sea polis nacional of guardia nacional.”  Aunke e cifra oficial ta 40, e ta declara cu e cantidad di victima ta mas grandi. Nan ta esun declara oficialmente victima di e manifestacion actualmente. Mayoria di nan ta hendenan jong entre 14 aña y 25 aña. Pero tambe baby di 2 luna bieu cu a muri sin aire producto di e gas lagrimogeno cu guardia nacional di Venezuela a uza contra e manifestantenan.

E famoso actriz Venezolano, Maite Delgado tabata un di e Venezolanonan cu a uni na e accion di protesta aki. E tabata exhibi riba su T-shirt preto un potret di Bryan David Jimenez di 14 aña kende a muri na Barquisimeto victima di arma di candela.

“Nuestro pueblo esta sufriendo. Nuestra Venezuela esta herida de muerte.” El a laga sa cu e echo cu actualmente nan no ta fisicamente na Venezuela, esaki no ta nifica cu nan no ta sinti dolor cu loke nan hendenan ta pasando aden dia aden dia afo. El a indica cu nan ta un grupo chikito pero representativo di e comunidad Venezolano residencia na Aruba.  E ta spera “cu poder di Dios” cu pronto e conflicto aki lo por haya un final; pero lamentablemente niun di e victimanan no lo bolbe na nan cas bek.

El a indica cu door di e protesta pacifico aki, nan ta halando atencion di henter mundo. Ya cu den cada pais unda tin presencia di Venezolanonan pa distinto motibo, ya sea cu nan a bandona  nan pais pa falta di trabou, politico, etc. nan ta sali cu e sentimento di patria den nan curason.

“Awe e patria Venezolano  ta reclama nos, y p’esey nos ta akinan”, el a bisa.  Tambe el a agrega cu diadomingo tabata Dia di Mama y door di nan accion pacifico nan a expresa e luto pa e mamanan y famianan cu a perde nan yiunan durante e dianan aki. “Como mama Venezolano nos tin poco di celebra.”

Un hoben cu a bay manifesta tambe tabata Maria Gabriela Aguilar kende tin dos aña bibando na Aruba. El a bisa cu Venezuela ta bibando un dictadura y lamentablemente e gobierno Chavista no ta bandona e poder pacifica ni democraticamente. “P’esey e pueblo tin mas cu 40 dia ariba caya.” Como Venezolano e tin dolor pa e situacion cu su pais ta pasando aden. P’esey el a dicidi di participa den e protesta pacifico “pa lanta mi bos pa nan por scucha nos y pa henter mundo sa cu na Venezuela ta existi un dictadura”.