For di 8or di mainta Venezolanonan a cuminsa yega na Centro di Bario Playa Pabao cu hopi entusiasmo pa asina cuminsa eherce nan derecho di vota y por eligi e candidato unico cu hunto cu Nicolas Maduro ta bay participa den eleccionnan presidencial cu ta bay tuma luga pa otro aña.

E biaha aki e centro di votacion ubica na Centro di Bario Playa Pabao tabatin cuatro mesa cu nan secretario, miembronan di mesa, presidentenan y testigonan cu tabata encarga di dirigi e votadonan pa eherce nan voto dependiendo di nan number di cedula.

Mas di 1.590 persona cu nacionalidad Venezolano tabata convoca e dia di ayera pa participa den eleccion aki, hasta despues di 4or di atardi tabatin 597 votado di e cual 584 di nan a duna nan voto na Maria Corina Machado.

Total di voto: 597

Marina Corina Machado: 584 voto
Delsa Solorzano: 3 voto
Andres Caleca: 1 voto
Andres Velazquez: 1 voto
Carlos Prosperi: 3 voto
Cesar Perez: 4 voto
Enrique Capriles Radonski: 1 voto

Ayera, 22 miyon Venezolano tabata yama pa eligi un candidato unico di oposicion cu otro ana ta bay enfrenta e chavismo den eleccion general, esaki ta forma parti di un acuerdo alcansa entre Gobierno y oposicion, cu otro paisnan den region como mediador y cu ta busca un eleccion presidencia “liber y transparente” den e segun semester di aña 2024.

Comision Nacional di Primarias (CNP) a traves di e red social “X” a anuncia cu e votacion a cuminsa cu total normalidad cerca di 8or di mainta, aunke cu ausencia di testigonan y otro miembronan di mesa na algun puntonan di votacion.

Tabata 10 e candidatonan cu tabata participa den esaki di e cual ta destaca e ex-diputado Maria Corina Machado y tambe ex-diputado Carlos Prosperi, segun algun encuestanan a señala.

Na Argentina e votacion di Eleccion Primario a ser suspendi ya cu tabata coincidi cu e fecha di eleccion presidencial cu tabata ayera y na Israel tambe a ser cancela debi na e guera cu tin na e momentonan aki contra e grupo Islamista Hamas.

Debi cu tabata trata di un proceso cu no tabata organisa pa Gobierno sino pa Oposicion, centronan di votacion tabata ubica na casnan, negoshinan, plasanan publico y parkeerplats.

Dia 17 di october ultimo representantenan di chavismo y di oposicion a firma un serie di acuerdonan den e cual ta inclui garantianan electoral y e autorisacion di tur candidato presidencial, “siempre y cuando nan lo cumpli cu rekisitonan estableci pa ley.”

E acuerdo aki a ser firma na Barbados, e cual tabata yen di tension y dialogonan suspendi, cu a cuminsa na Mexico na 2021 y den cual Noruega tabata mediador.

Eleccion Primario di ayera 22 di october ta esun prome cu oposicion ta acudi for di 11 aña atras, marcando un posibilidad nobo di saca e chavismo di poder despues di 24 aña.

Despues di e acuerdo di Barbados, Departamento di Tesoro a acorda cu oficialismo di kita algun sancion cu tabata impedi benta di petroleo Venezolano den exterior.

Di e banda aki, Eleccion Primario ta genera expectativa di mehora e situacion di Venezuela, pais di na unda 7 miyon Venezolano a sali den ultimo 10 aña, un di e exodo migratorio mas grandi di e siglo aki segun UNHCR.

No obstante, Venezolanonan ta mira cu cierto duda eleccion presidencial ya cu na 2021 durante ultimo eleccion regional y municipal tabatin prohibicion pa vota den exterior y Conseho Nacional Electoral a rechasa 27 candidatura.

Ademas, e candidato Maria Corina Machado ta conta cu un inhabilitacion politico di 15 aña, despues cu a acus’e di duna respaldo na sancion di Merca contra Venezuela na 2015 y duna su apoyo politico na Juan Guaido, lo cual por ta un impedimento pa e lo por presenta den eleccion presidencial di 2024 den caso di logra e victoria den eleccion primario aki.