Ayera a reina un ambiente di expectativa cerca e comunidad Venezolano residencia na Aruba den cuadro di e instalacion di e Asamblea Nacional nobo. Despues di 17 aña cu e congreso aki a wordo domina pa miembronan di partido Chavista; ayera miembronan di partidonan di oposicion a tuma e control di e organismo legislativo aki.
E activista Venezolano di oposicion residencia na Aruba , sra. Laura Luces, a declara cu e aña nobo a habri cu e echo aki. P’esey e ta considera cu 2016 lo ta un aña di speransa pa su pais. “E ta un aña di renace, pero nos mester warda kico lo por pasa….”, el a bisa na Bon Dia Aruba. Sin embargo el observa cu e ambiente cu tabata existi ayera den instalacion di e congreso nobo di Venezuela tabata uno di tension.
Sra. Luces a agrega cu e ambiente aki no a eclipse e felicidad cu e pueblo di Venezuela tabatin, ya cu nan ta spera cu “nos lo por caba cu e pasadia aki”. E ta kere cu si e gobierno Chavista di presidente Nicolas Maduro ta laga e congreso nobo traha, nan lo trece berdadero cambionan positivo na Venezuela. “Si nan ta respeta e Constitucion si nan lo trece cambio…”, el a indica.
El a bisa cu asamblea Nacional no ta gobierno cu ta encarga cu e maneho economico, relacion interior y exterior bou e regimen di presidente Nicolas Maduro. Pero aworaki a keda instala un asamblea cu ta den man diferente di esunnan cu tabatin e control di e organo aki pa 17 aña. “Nan ta esunnan cu a horta nos pais. Nan a laga Venezuela den un estado monstruoso. E ta un di e prome paisnan afecta pa delincuencia”, el a declara.
El a bisa cu ni sikiera Cuba ta pasando dor di e situacion cu su pais Venezuela ta pasando actualmente, unda e muchanan ta muri pa falta di tratamento di cancer, etc… “Nos tur sa e problemanan cu Venezuela ta pasando aden”, el a bisa. El a condena e echo cu e gobierno Chavista a malgasta di un forma “infame” e bonansa petrolero cu nunca un gobierno anterior a yega di conoce. Loke nan a haci ta horta y prostitui e pais. E ta un narco-estado unda e droga y corupcion ta reina”, el a bisa.
E coalicion di oposicion na Venezuela den eleccion di dia 6 di december ultimo a logra 112 di e total di 167 stoel den Asamblea Nacional of Congreso. E mayoria aki ta garantisa un “mayoria cualifica” cu lo por permiti pa convoca un Asamblea Constituyente y aproba un reforma constitucional. Tambe nan lo tin facultad pa nombra of kita e magistradonan di Tribunal Supremo, nombra rectornan di Conseho Nacional Electoral, fiscalia general, Controlado general y Defensor di pueblo.
