Tres amigo Venezolano cu a bandona Caracas siete luna pasa pa motibo di inseguridad, ta bende riba autobus di Bogota – Colombia nan biyete di 100 bolivar, como obheto di coleccion pa purba sobrevivi, pasobra nan ta bisa cu e placa Venezolano “no ta sirbi pa na.”

Manera un souvenir, e hombernan ta bende e biyete aki, ekivalente na Venezuela na 14 cent di dollar, na un costo di 1000 peso Colombiano (0.3 dollar), Gustavo Mendoza a splica. Gustavo a ser entrevista na un stacion di e sistema masal di transporte Transmilenio na Colombia.

“Nos ta bende e biyete pasobra awor e tin un balor manera un articulo di coleccion (…) y tambe pasobra polis a kita mercancia cu nos tabata bende,” Mendoza a splica. El a bisa cu e ta bende caramel tambe  riba autobus di Bogota.

E oferta cu e Caraqueño ta ofrece tin biyete di 10, 20 y 50  bolivar, aunke e biyete mas busca ta esun di 100, un papel cu tin e seyo  libertador Simon Bolivar.  E biyete di 100 mester a sali di circulacion na luna di december cu a pasa na Venezuela, pero gobierno tin retraso den introduccion di e famia nobo di moneda.

Gobierno Venezolano a laga e vigencia di biyete di 100 bolivar sigui core te dia 20 di juli, despues cu a sigura cu e sistema di banco di Venezuela lo garantisa nan uso y circulacion. Despues cu Venezolanonan a para den fila largo pa deposita e biyetenan na banco, ora cu nan a haya sa cu gobierno lo retira nan di circulacion.

“Awor aki na Colombia nos ta reuni entre 25.000 y 35.000 peso pa dia (entre 8.6 y 12 dollar) cu e biyete ey. Ta e placa net  pa nos biba,  pero cu esfuerso,” Mendoza a splica.  Mendoza ta un homber gordo y un profesional di educacion, e no a duna mas detaye di cuanto biyete e tin den su poder of di cantidad di biyete cu e kier bende riba autobus.

Dilanti di e mirada di hende caweta, e homber  ta bay stoel  pa stoel  den  autobus y ta duna cada hende un papel, cu ta bisa cu: “Si algun biyete tin un rasca of mancha, nos tin mas pa cambia.”

Mendoza cu su accent Venezolano, ta tuma oportunidad pa promociona su mes como un bon trahador y ta solicita riba cualkier cupo di trabao, pasobra segun e ta bisa, “tin hopi problema cu polis ora cu bo ta traha riba bus cu benta di biyete.”

Tur tres homber ta biba hunto den un bario di clase abao na Bogota. Nan a bisa cu nan a haya un bon ricibimento pasobra Colombia tin hopi hende di Venezuela bibando pa motibo di e crisis politico, social y economico na  Venezuela.

Den otro extremo di e bus cu e periodista a scoge pa haci e trabao di entrevista, nan a wak Claudia  y su ruman, dos Venezolano mas cu a yega Bogota algun dia pasa, y cu ta purba di bende caramel, mientras nan ta mustra otro e famoso biyete di 100 bolivar.

“Cu e biyete  aki, cu ta esun di mas balor na Venezuela, aki nan ta duna nos 50 peso Colombiano, cu ta ekivalente na 0.01 dollar, un di e hombernan a bisa. El a bisa cu na Venezuela nan mester di 60 biyete di 100 bolivar pa cumpra un paki di hariña.

Nan no ta e unico hendenan cu ta traha den comercio informal. Segun indice di migracion na Colombia, entre dia 1 di januari y 26 di april di aña 2017, como 8.306 persona a drenta  Colombia desde Venezuela, igualmente a sali como 7,856,5554.

Segun indice di migracion na aña 2014 autoridadnan a duna 11.429 cedula di estranheria. E documento aki ta ofrece e posibilidad pa hende stranhero di haya miho trabao y seguridad social. E aña cu a pasa e cantidad a subi te 15.523.

“Na cualkier parti di Venezuela no tin seguridad. Na cualkier momento delincuencia por horta bo. Delincuentenan por tira bo si bo ta resisti, y no ta di banda di gobierno so, ta di tur dos banda,” Mendoza a splica. El a bisa cu gobierno y oposicion tin un guera entre nan.”

Segun Mendoza e delincuencia y inseguridad ta otro motibo pa bay di Venezuela, pasobra e guera ta e causa di hopi protesta na Venezuela, pa mas di dos luna. Segun gobierno e protesta a laga como 80 morto atras.

“No tin medicina. Tur cos cu nos por haya ta ‘bachaquiado’ (un persona cu ta cumpra na prijs normal y despues nan ta bende na prijs hopi mas halto di su prijs normal, pa tal motibo hopi hende no tin acceso na productonan.

“E solucion awor por ta bende algun cos cu nos tin, entre nan ta e biyete cu no ta sirbi pa nada”