Diasabra ultimo banda di 5’or y mey atardi, un grupo di Venezolano y di otro nacionalidad a uni nan mes na Plaza Simon Bolivar pa participa den un mobilisacion mundial contra e “victimanan di e dictadura” di presidente Nicolas Maduro.
Nan a haci un yamada pa henter mundo reacciona riba e situacion interno cu ta tumando luga na Venezuela, unda hendenan –mayoria di nan hende jong- a muri durante 52 dia di manifestacion den nan teritorio nacional.
Dialuna pasa otro grupo mas chikito bisti na preto a bay protesta pacificamente dilanti di Consulado di Venezuela na Aruba. E grupo di diasabra tabata mas grandi y mayoria di nan tabata bisti na blanco; y nan a conta cu presencia di Monseñor di e Diocesis di Willemstad, Luis Antonio Seco.
Monseñor Seco a realisa un oracion pidiendo pa paz y bienestar di e pueblo Venezolano cu ta pasando den un situacion duro te hasta di hamber, a pesar cu nan ta un pais rico. Igualmente el a pidi pa tur creyente uni nan mes den oracion pidiendo pa un solucion faborabel den e pais bisiña.
El a declara na Bon Dia Aruba cu e conferencia Episcopal di Venezuela a manda un carta cu un mensahe masha bunita unda nan a pidi pa den henter teritorio di Venezuela, pero tambe cerca e comunidad Venezolano bibando den diferente pais di mundo, pa nan uni nan mes den oracion.
“E ta un dia di oracion pa Venezuela. Nos ta uni nos tur y ya caba nos a reuni awe tardi (diasabra); y mi ta hopi contento di por ta akinan presente”, e religioso ta bisa.
El a bisa cu cada parokia rond di Aruba lo a pidi pa paz na Venezuela durante celebracion di Santo Sacrificio di Misa di diadomingo ultimo. E ta kere cu ta oportuno pa den cada Eucaristia nan lo por bin cu palabra di paz, reconciliacion y pordon.
“Esey ta loke nos kier! Nos no kier bisa: ban lucha! Ban muri! Of perde nos bida. Pa kico? Si nos tur ta ruman”, asina Monseñor Seco ta bisa.
E reunion aki a culmina pacificamente, sin problema pero si cu borchinan y palabranan contra presidente Nicolas Maduro y su gobierno Chavista.
