Den combersacionnan cu instancianan cu di awo padilanti lo cuminsa traha hunto estrechamente bou capa di veiligheidshuis, por a mira cu tres punto lo keda primordial pa e concepto aki floria.

Privacidad di famianan keda salvaguardia, mas experticio bin hunto pa resolve problemanan y cu mester tin suficiente medionan pa colabora di manera eficiente.

Durante apertura oficial di e cas di siguridad di Aruba of e asina yama veiligheidshuis, Bon Dia a combersa cu diferente instancianan riba kico e momento aki ta nifica pa nan, mirando cu e proyecto aki ta nifica cu e instancianan den cadena social y hudicial lo bay traha mas estrechamente cu otro.

Veiligheidshuis mas cu un proyecto ta un manera di traha, manera e coordinado nobo di e veiligheidshuis a splica durante e apertura. Pues e oficina unda e ta situa, den Ministerio Publico, no ta literalmente un cas unda hende por bay, pero mas bien unda instancianan hunto por delibera riba e diferente casonan cu lo por bin dilanti. E manera di trata e casonan aki lo ta mirando tur cos di varios angulonan pa percura cu tur problematica cu un famia ta enfrenta haya un debido atencion, pa asina percura pa un Aruba mas sigur.

FHMD: Privacidad primordial
Un di e puntonan cu Magaly Maduro kende ta coordinado na Fundacion pa Hende Muhe den Dificultad (FHMD) ta subraya ta cu a firma un protocol pa sigura e privacidad di e casonan y clientenan cu lo bay trata den e veiligheidshuis. E partnernan esencial den e colaboracion aki a firma esaki. “Nos comunidad ta chikito anto hopi lihe cosnan ta bay afo cual no ta pa yuda e famia. Cu e protocol aki ta garantisa cu e ayudo ta na su luga y cu e privacidad di e cliente ta keda garantisa.”

Sra. Maduro ta spera cu por medio di e manera di anda cu privacidad di famianan lo conduci na ‘famianan cu ta habri nan mes mas tanto’. Ademas sra. Maduro ta spera di e profesionalnan den e veiligheidshuis cu nan lo bay reconoce e problemanan di e personanan di cual su casonan nan lo trata.

Aunke FHMD no ta un di e partnernan esencial den e colaboracion aki, e instancianan aki por acerca FHMD of otro instancianan pa tambe papia cu e partnernan cu ta den e team si tin manera cu nan por yuda of nan conoce cierto casonan di cerca. “E idea di e veiligheidshuis ta pa traha un plan di diferente sector pa yuda e famia. Pues no ta solo un organisacion yudando e famia, ta ataca e problema di diferente angulo. Si e angulo ta violencia domestico of violencia di genero e ora ey nos lo sinta cu nan.”

E manera inclusivo di traha segun sra. Maduro ta refleha e tipo di problemanan cu ta surgi den situacionnan dificil na cas, por ehempel, cu por crea problemanan den diferente area. “Ta importante pa nos realisa cuanto consecuencia tin pa muchanan cu ta lanta den violencia domestico. Na scol nan no ta bay bon y nan tin problemanan di comportacion. Asina bo por mira cu tin diferente manera di expresa cu cosnan no ta bon na cas.”

Den combersacionnan cu diferente personanan trahando den instancianan social por a scucha cu nan ta gradici na procurador general Alexander van Dam kende nan ta haya tabata un di e personanan cu a pusha e concepto di veiligheidshuis na Aruba.
PG: ‘Instancianan ta aporta na conocemento cu OM no tin’
Reaccionando riba esaki, PG sr. van Dam a splica cu su motivacion pa bin cu esaki na Aruba tabata cu el a mira e concepto aki floria na Hulanda unda por a constata cu den mayoria di caso tin un corelacion entre antecedente hudicial y situacion social di un persona. “Por ehempel bo tin un persona cu ta un adicto y e ta bira un criminal pa via di adiccion. Pero si e logra surpasa esaki y cura su mes e lo purba haya un trabou, mescos cu ami y abo. Ora e tin e trabou e lo stop di horta of haci cualkier otro crimen. E ta zona simpel. Pero e punto di partida pa esaki ta cu si bo por yuda hende pa siña con pa lanta nan yiunan – mi mes ta un tata y mi sa e ta un hell of a job- si bo pone hende di sector social y curativo hunto cu sector hudicial, bo por poco poco y un pa un percura pa hende no drenta KIA cual ta bira un ganashi den sociedad.”

Pues e concepto aki ta uno cu sr. van Dam a conoce na Hulanda y tabata riba su to-do list pa trece esaki na Aruba tambe. Corsou y Boneiro tambe tin esaki. “Loke ta bunita di e veiligheidshuis ta cu cada instancia, manera Reclassering, tin un bista riba problemanan specifico y cu nos di Ministerio Publico no sa nada di dje. Pues bo por bisa cu cada instancia cu ta traha hunto desde awo bou e veiligheidshuis tin un pida di e puzzel.”

Reclassering: ‘Tiki medionan ta crea limitacion pa manera di traha’

E enfasis riba traha hunto ta uno cu ta sumamente importante, segun Seraida Pemberton, Bureau Hoofd na Stichting Reclassering & Jeugdbescherming. Den hopi caso, segun sra. Pemberton, no ta un instancia so por ataca e problemanan. Pues e manera di traha aki por responsabilisa cada un den cada caso. Esaki ta haci e cadena den henter e sector mas fuerte, mirando cu di e manera aki ta haci liñanan di comunicacion mas cortico.

Aunke sra. Pemberton ta apoya esaki completamente, e tin su beneficionan y tambe su limitacionnan. “E ta efectivo, pero e parti cu mester pone atencion riba dje ta cu Aruba mes tin tiki medionan pa haci uzo di dje den cierto casonan. Dos cos e ora ey ta importante, pa bo tin un persona cu ta coordina y ta follow up riba casonan, pero tambe pa e partnernan haya e hermentnan necesario pa nan por traha cu ne. Bo por tin un instancia manera veiligheidshuis pero si cada instancia no tin herment y no tin personal e ora ey e no lo tin e resultadonan cu nos lo kier yega na dje.”