Veiligheidshuis– cual a keda concretisa ayera atardi ta un concepto pa percura cu instancianan ‘no bira islanan riba nan mes’, obligando nan pa traha hunto, segun Seraida Pemberton di Stichting Reclassering.
Ayera atardi tabatin firmamento di decreto ministerial entre prome minister, minister di husticia y minister di asuntonan social pa formalisa ehecucion di cas di siguridad (Veiligheidshuis). E proyecto aki ta pa promove cooperacion y un maneho integral entre instancianan social y hudicial pa percura cu gruponan vulnerabel den comunidad haya manera pa scapa e circunstancianan cu ta conduci nan pa wordo manda KIA.
E concepto aki manera nos a raporta den pasado Ministerio Publico a anunci’e cuminsamento riba trabounan pa adapta esaki, mirando cu ta hopi efectivo na Hulanda.
Minister di husticia Andin Bikker (POR) y prome minister Evelyn Wever-Croes (MEP) a duna nan respaldo na e proyecto aki hunto cu minister di asuntonan social Glenbert Croes (MEP) por medio di firma e decreto nacional. Segun sr. Bikker e proyecto aki ya caba tabata den pipeline pero gobierno di coalicion por yuda pone mas forsa na e trabounan tumando luga caba.
Plannan pa construi un KIA nobo
Meta di e concepto di Veiligheidshuis ta pa percura cu personanan cu bin den contacto cu husticia pa via di problemanan social haya un manera pa por sanea nan situacion. E minister encarga cu KIA a expresa cu despues di bishita e instituto di coreccion na Aruba por a mira cu e tabata den un estado deplorabel. Esaki tambe ta percura cu e enfoke riba por rehabilita personanan cu drenta ta cay atras. Ambos procurador general Alexander van Dam y sr. Bikker a enfatisa cu e proyecto di cas di siguridad lo hunga un rol importante pa preveni ‘draaideur criminelen’ (recidivistanan criminal).
E proyecto actualmente ta gosa di 500.000 florin segun minister Bikker pa por haci colaboracion entre instancianan mas realisabel. Tin varios fundacionnan y instancianan gubernamental cu lo traha hunto bou auspicio di e veiligheidshuis: incluyendo Stichting Reclassering en Jeugdbescherming, Bureau Leerplicht, Bureau Sostenemi. Den pasado procurador general a yega di expresa cu e interes di e organisacionnan lo ta sumamente importante, mirando cu ‘ministerio publico no por haci esaki su so’.
Veiligheidshuis importante pa ‘instancianan no bira isla’
Pe mesun rason nos a dicidi di combersa cu Stichting Reclassering kende den pasado a subraya cu nan tin falta di personal y fondo pa por traha di manera optimal. Seraida Pemberton, directora di e fundacion ta conta Bon Dia cu te awo e proyecto ta den proceso pa wordo implementa, pero no a cuminsa ainda.
Sra. Pemberton ta haya cu e proyecto ta sumamente necesario pa percura cu departamentonan no bira islanan cu no ta colabora cu otro. “E ta forsa instancianan pa traha hunto riba casonan cu surgi, cual ta hopi importante.”
Sinembargo e directora a subraya cu e falta di personal y falta di fondo lo por tranca e proceso pa e proyecto cuminsa cu un colaboracion amplio di biaha. Aunke cu na Corsou y Boneiro e concepto aki a hayando forma caba, e directora di e fundacion ta señala cu podise e efecto riba comunidad no lo bira visibel di biaha. Sinembargo riba termino largo e manera di traha lo tin hopi beneficionan, mirando cu e problema social na Aruba ta hopi grandi, segun sra. Pemperton.
