Manera ta conoci prome minister demisionario Evelyn Wever-Croes a presenta diahuebs ultimo e Relato Anual (Jaarverslag)2024 pa loke ta trata e ministerionan cu e ta encarga cune, ministerio di Asuntonan General, Innovacion, Organisacion Gubernamental, Infrastructura y Planificacion Teritorial. Como minister di Asuntonan general, den e relato anual e mandatario ta elabora riba e Veiligheidshuis Aruba, con e colaboracion di esaki a bay y resultadonan pa aña 2024.

E Veiligheidshuis Aruba a ser lanta dia 24 di mei 2018 y ta un localidad fisico unda cu diferente institucion for di e cadena penal y di cuido y otro partnernan (manera enseñansa) ta traha hunto pa reduci molester, violencia domestico y criminalidad tras di cual problemanan compleho ta scondi. E balor agrega di e colaboracion ta un acercamento di cadena crusa cu ta fortalece e acercamentonan individual. Tur partner ta retene nan mes na responsabilidadnan (legal). E prome minister ta e presidente di e Comite di Maneho di Alto Nivel di e Veiligheidshuis Aruba.

Partnernan principal den e colaboracion aki ta e Bureau Leerplicht, Bureau Slachtofferhulp, Bureau Sostenemi, Dienst Publieke Scholen (zorgteam), Directie Sociale Zaken, Directie Voogdijraad, FCCA, Fundacion Guia Mi, Fundacion Salud Mental Aruba Respaldo, Korps Politie Aruba, ministerio di Husticia y Asuntonan Social, Ministerio Publico (OM), Stichting Hunto, Stichting Reclassering Aruba, KIA y Wit Gele Kruis.

Partnernan nobo di convenio ta Zorgteam Stichting EPB y Tienda di Educacion.

Veiligheidshuis Aruba tin gruponan specifico como obhetivo. E gruponan aki, ta e gruponan caminda asuntonan compleho ta sucede principalmente. Netamente pa e motibo aki e Veiligsheidshuis ta enfoca riba cierto gruponan como obhetivo. E gruponan aki ta entre otro hobennan na riesgo, hende cu comportamento cu no ta ser comprendi, problemanan di diagnostico dobel, actor y victimanan di violencia relacional, adulto mayor, personanan indocumenta y delincuentenan cu ta ripiti actonan criminal.

Pa loke ta e resultadonan di colaboracionnan den 2024 di e Veiligheidshuis Aruba, consulta di cuido y seguridad ta central den e asociacion aki. Durante e consulta bisemanal, tanto registracionnan nobo a ser discuti como tambe e plan di accion sistematico determina, y tambe e feedback y coordinacion di e casonan cu ta ser trata caba.

Den e relato anual ta sigui splica cu na 2024, un sistema digital nobo a keda introduci (mas facil pa usa) pa sostene e procesonan di trabou aki. Na 2024, 19 consulta di cuido di salud y seguridad a tuma luga cu un participacion di 97% di e partnernan nucleo y 99 registracion nobo a keda registra den e sistema di sosten di casonan digital.

Un total di 131 caso cu asuntonan multi-problema compleho a ser procesa, esaki ta inclui registracionnan nobo y estudionan di caso continuo. E asuntonan rond di e hobennan di riesgo halto, problemanan di adiccion y psikiatria ta saca e puntuacion mas halto aki.

Pa loke ta trata e estudionan di caso di feedback, entre 25 y 30 caso ta ser discuti pa reunion di cuido y seguridad cu ta ser procesa caba y tin coordinacion di e palabracionnan haci y e estado di cosnan actual. Si tin mas, intervencion ta necesario y e plan di accion mester ser ahusta, of e caso por ser cera.

Mas cu mita di e casonan (65%) ta ser maneha exitosamente pa medio di e acercamento conhunto y e asistencia y tratamento den e cadena di cuido. Si ta necesario, nan lo ser reintroduci door di e gerente di caso.

E relato anual ta remarca cu den esaki ta bolbe mira un aumento den ripiticion di registracionnan, parcialmente pasobra e terapia y remedi no ta ser sigui estrictamente, y pasobra hopi biaha e persona no tin bista riba su mesun condicion medico. Como tambe otro factornan manera vivienda y problemanan financiero.

Pa loke ta e tendencia y desaroyonan, den e relato anual di prome minister ta splica cu e desaroyo preocupante observa den añanan recien pa loke ta trata hobennan na riesgo y hobennan cu ta evita cuido lamentablemente ta continua y por mira cu awor hoben y muchanan muhe menor di edad en particular den situacionnan insigur.

Esaki ta debi na e problemanan compleho subyacente manera deshabilidad intelectual leve (ID), bandona scol, violencia domestico, adiccion, trauma di infancia trempan, problemanan psikiatrico, problemanan financiero, vivienda, relacionnan mayor-yiu, problemanan di criansa como tambe criminalnan cu ta abusa di hobennan den un posicion vulnerabel ora di comete crimen di minamento (di droga).

En bista di loke ya caba a ser menciona, e consulta di cas di cuido di salud y seguridad a ser amplia pa inclui partnernan di pacto cu ta particularmente preocupa cu e grupo di enfoke aki ta traha hunto pa logra un acercamento integral y pa comparti conocemento y informacion

pa comparti. E Veiligheidshuis Aruba ta sirbi como un centro di conocemento.

E relato anual ta remarca cu e situacion espantoso y hopi biaha inhumano y/of condicionnan di bida di adultonan mayor ta aumentando y ta un preocupacion grandi. Ademas di e enfoke riba hubentud, e acercamento sostenibel y desaroyo di cadena pa loke ta trata e problemanan rond di e otro gruponan di enfoke ariba menciona di e Veiligheidshuis Aruba ta un prioridad.

E asistencia cu un Veiligheidshuis ta duna ta dirigi na e actor, victimanan y otro partidonan envolvi, manera por ehempel miembronan di famia, pariente of bisiñanan. Hopi biaha e ta concerni actornan cu problemanan multiple y structural, principalmente den e areanan di trabou y entrada, adiccion, salud mental of vivienda. E meta ta pa yuda e personanan envolvi pa duna guia a largo plaso pa solucionnan structural y pa preveni recaida.

No tin un solucion pa tur caso, pero esakinan ta registra riba e asina yama “lista di sombra”. Of den particular e casonan di diagnosis dobel, hobennan cu ta bin na remarke pa husticia cu ta rekeri tratamento den un ambiente cera y pa hende muhe adicto tin hopi necesidad di facilidadnan. Como tambe cuido despues pa esnan cu a pasa den tratamento pa loke ta trata nan adiccion cu a mester a ser trata den exterior.

Den e relato anual ta subraya cu e retonan no ta disminuyendo, ni ta menos compleho. Mantencion di dialogo cu otro ta un ‘must’ pa e realisacion di e perspectivanan pa e casonan ey caminda ta falta precondicionnan crucial.