Segun Departamento di Impuesto, ta asina cu tin un stipulacion nobo den ley aworaki pa autonan mas bieu cu 30 aña. Pa autonan cu tin un bouwjaar di 1987 of mas bieu, e doño di e vehiculonan aki ta bin na remarke pa haya 50% di descuento.
“A bin un confusion den esey pasobra tin cliente cu a kere cu si nan tin nan number pa 30 aña of mas, nan ta haya 50% di descuento cual no ta e caso,” sra. Meverly Romano, vocero di Departamento di Impuesto ta bisa. Den e categoria aki ta papiando di autonan clasico. E no ta bay pa e autonan cu ta clasico y aworaki drecha bunita so, pero e ta bay pa tur vehiculo pues cu un bouwjaar di 1987 of mas atras. E por ta un truck, brommer of cualkier vehiculo cu ta cumpli cu e rekisito aki.
Flexibilidad necesario
Pa ley, automobilistanan tin te 31 di januari pa paga nan number di auto. Departamento di Impuesto a haya hopi pregunta tocante kico ta pasa si no paga number di auto despues di e fecha aki. Segun nan ta informa, pa e biaha aki no ta bay over na cobransa adicional si no cumpli cu pago na dicho fecha pa mantene flexibilidad. Despues di 31 di januari, pa ley, di awor pa dilanti Departamento di Impuesto tin e autoridad di saca cobransa adicional pa e cliente cu no a paga. Tambe lo por haya un boet di 100% acerca cual ta regla den ley. Pero den practica, Departamento di Impuesto no ta bay saca cobransanan adicional pa e biaha aki pa mantene un flexibilidad e aña akinan. “Aworakinan mi no por bisa ki tempo e cobransanan adicional lo sali,” sra. Romano ta bisa. Ora cu ta cla pa bay over na esaki – pues cobransa di e ‘naheffingsaanslag’ -Departamento di Impuesto lo avisa na un tempo adelanta. “No ta den nos maneho pa mesora saca cobransa adicional anto inclui e 100% di multa. Esaki ta un ley cu a bin cu cambionan grandi anto nos kier mantene e flexibilidad necesario pa laga nos cliente custumbra cu e idea cu cos a cambia.”
