Den un reciente entrevista Meredith Marin a splica tocante escogencia di un persona vegan y con su curpa ta sinti mas energia y un cambio grandi ora cambia estilo di bida y ta opta pa no come nada mas cu ta producto animal.

“Un balor cu ta duna na bida di otro, di no haci daño na otro,” asina e ta agrega. Cu e balor ey e ta duna como ponencia cu “hende no ta come animal pasobra no tin manera di come nan sin haci nan daño, manera haya lechi sin lastima e baca.”

Tambe e ta remarca cu e escogencia ta importa. “E decision di locual ta cumpra na supermarket. Mi mester mira si e ta algo cu no ta haci daño. Si e ta un tiki mas costoso, no ta problema basta mi por haci un diferencia na mundo y sinti mi mes bon.”

Un persona ‘vegan’ en principio ta come solamente cuminda cu base vegetal. Tambe ta importante pa come mas tanto posibel cuminda no procesa y cu no ta contene demasiado sucu ni demasiado vet. Esey lo yuda pa mantene e peso natural cu e persona tin. Un curpa cu ta haya demasiado nutriente ta transforma esaki den vet, mas cu e nivel natural di vet cu un curpa mester tin.

E ta agrega cu si come demasiado vet, e curpa no ta reacciona adecuadamente y ta procesa esaki den reserva no necesario. Sinembargo, ora ta cuminsa come saludabel e persona ta ripara un cambio; e lo sinti mas energia, sin corda kico e tabata sinti como un persona cu no tin energia. Henter su famia ta vegan, e ta conta.

Pa locual ta trata su digestion, e ta bisa cu si un persona ta come mas producto vegetal cu animal, e persona por perde peso, si e no ta come un exceso di carbohidrato. E ta remarca cu si un persona ta bira vegan e no por spera cu den un siman tur cos den su sistema ta cambia, ta posibel cu bo ta bay sinti miho.”

Esaki ta depende di e persona su curpa pero cu tempo bo ta cuminsa mira e transicion, di cambio den bo tripanan, den bo digestion. E ta agrega si cu e persona no mester detox, pa motibo cu eyden tin dos tipo di bacteria, e bon y e malo, anto e bacteria bon ta loke e curpa mester pa digeri bon.

Marin ta bisa cu un persona mester inverti den su salud pa evita cu den futuro mester paga pa gasto medico. Sinembargo e ta bisa cu tin variedad di opcion cu hende por haya; nan por ta caro pero mester mira esey como inversion.” Ademas e no ta causa ningun dolor na ningun hende.

Hende ta hopi obsesivo cu keshi, pero no ta consciente di kico ta implica come tanto di esaki. E ta splica cu lechi ta pa un baca duna su yiu. E kimico produci den e hormonanan cu e baca ta duna, e persona awendia ta adicto na e hormona ey manera droga; “algo cu mester corta por completo.”

Locual lechi ta haci pa un baca su yiu ta pa e baca crece hopi den un aña. E ta pone cu su yiu ta subi peso lihe. Pa e motibo ey e lechi ta yena cu vet, pero e ta un fase di transicion, esey hende tin cu compronde, pa dado momento laga e keshi.

Persona vegan ta mas consciente den locual nan ta pone den nan curpa. “Hopi vegan ta come GMO (materia geneticamente modifica), pero ta conoci cu esakinan por tin efecto destructivo den medio ambiente. Tin di nan cu ta produci un insecticide cu por destrui naturalesa.

Mayoria di GMO ta pa duna animal come y tin persona cu tin miedo di pone GMO den nan curpa, pero via e animal nan ta hay’e toch. “Nos kier come cuminda barata, no organico, anto ta ingeri GMO.”

E ta agrega cu un persona mester ta bon informa y lesa tur cos pa asina ta sigur kico ta bon. E informacion mester ta corecto pasobra eyfo tin informacion cu ta bruha hende. “Vegan ta cuestion di studia y lesa pero bo no ta sigur, ta tristo cu no semper tin e informacion corecto.”

E ta agrega si cu na comienso e por ta un reto pero e curpa ta logra tuma e forma nobo di alimenta. “No give up pasobra na final e curpa lo sinti bon.” Tampoco tur persona cu ta vegan mester haci yoga aunke e ta recomenda esey. E ta splica cu yoga su fundamento ta cu ta bisa cu no mester causa ningun daño na cualkier persona of animal.

Bon Dia Aruba a puntra Marin si un persona vegan mester ta flaco. E ta contesta cu e no ta asina, ora e mes tabata vegetarian el a subi peso anto e mester a baha. Despues cu el a bira vegan el a siña cushina “basa riba locual bo mester”, agregando si cu vegan no ta nifica un dieta pero un cambio di mentalidad.