Vaticano ta lansa task force pa yuda misa preveni abuso

Vaticano ta lansando un task force di expertonan pa yuda diocesis Catolico y ordennan religioso desaroya un guia con pa maneha casonan di abuso sexual na man di clero y yuda e sobrevivientenan.

A propone e iniciativa aña pasa durante e cumbre di Papa Francisco tocante prevencion di abuso. A considera esaki necesario mirando cu lidernan Catolico den algun parti di mundo – principalmente areanan pober, afecta pa conflicto na Asia y Africa – no a cumpli cu un directiva di Vaticano na 2011 pa desaroya e guia.

Participantenan di e task force a bisa diabierna cu e meta ta pa duna experticio legal y yuda diocesis y ordennan religioso cu no tin e recursonan profesional of di otro forma a neglisha di cumpli cu e directiva di 2011.

E guianan tin meta pa establece proceduranan pa ricibi keho di victimanan y duna nan cuido pastoral, train personal di iglesia riba prevencion di abuso y strategianan di proteccion di mucha, y sigui e proceduranan legal interno di iglesia pa investiga acusacion.

Vaticano ta rekeri unicamente pa reporte acusacion di abuso na cas, no na polis. Vaticano ta bisa cu lidernan di iglesia mester reporta na polis unicamente unda ley civil ta rekeri esaki.

E task force ta e iniciativa mas recien di Vaticano pa subraya e naturalesa global di abuso sexual na man di clero, despues cu pa decadas e hierarkia Catolico a insisti cu tabata un problema exclusivo den mundo di habla Ingles. E scandal awo ta explotando den e Latino America natal di Francisco, y den e fieramente catolico Italia y Polonia.

Ta spera cu pronto lo revela otro iniciativa, un manual di instruccion pa arzobispo of superior religioso conduci investigacion canonico na momento cu ricibi acusacion contra un di nan pastoor. Arzobisponan rond mundo pa largo a faya di investiga of castiga abusadonan, considerando violacion y abuso di mucha como un fayo moral na luga di un crimen.

E task force ta consisti principalmente di abogadonan canonico y ta lidera pa cuatro lider di iglesia kende a organisa e cumbre di Francisco na 2019 tocante abuso, incluyendo e fiscal di Vaticano pa crimen sexual, Arzobispo Maltes Charles Scicluna, y experto lider den proteccion di mucha, reverendo Hans Zollner. Hunto cu cardenal di Chicago, Blase Cupich y cardenal di Mumbai, Oswald Gracias, nan ta reporta na No. 2 den secretariado di estado Vaticano, un indicacion di e importancia central cu Vaticano ta poniendo riba e iniciativa.