Varios scol ta warda riba renobacion y material

Temporada di vakantie grandi ta nos tras mientras awor un otro aña escolar nobo a habri y varios scol ta conta Bon Dia cu apesar di tur e entusiasmo, nan ta spera cu pronto ta nan beurt pa proyectonan di renobacion y siguramente material di scol di locual varios di nan ainda ta haya falta di dje.

Segun directora suplente di Ceque MAVO College ta splica Bon Dia, scol a cera bon y tambe el a cuminsa super bon. ”Nos a haya buki aña pasa, ayera tambe nos a haya set di buki nobo pues cosnan a drenta. Nos material mayoria ta buki anto aki aya nos ta haci uzo di copia. E scol ta completo nos tin hopi alumno e aña aki, nos tin docente nobo y honestamente nos no tin nada di keha di dje anto e dushi ta cu e ta un scol chikito.” Sra. Martinez di Ceque MAVO College ta conta Bon Dia. 

Sinembargo,  Juliana School cu ta bay haci pronto 100 aña di existencia ta bisa Bon Dia cu nan no ta keha pero nan ta spera cu pronto renobacion cuminsa na nan scol pasobra nan mester di esaki. ”Mas tanto ta e edificio mes,  e fundeshi ta un tiki na werki tambe. Nos ta wardando riba e momento pa nan bisa nos pa sali pa e trabaonan cuminsa. Nos ta riba e lista, nos sa esey pues nos no ta keha, pero e ta birando tiki mas pio dia pa dia pues e ta birando un poco fastioso.”  directiva di Juliana School ta conta Bon Dia. Juliana School tin e aña aki tres prome klas, cuater klas dos y tercer grado anto tres klas di examen cual ta mas o menos un total di 320 pa 340 alumno na e scol. Un alumno di Juliana School ta conta Bon Dia cu e ta haya berdad hopi laf cu e scol ta den e situacion cu e ta pero cu e no por haci nada cu djis presenta na scol y haci su best pa siña anto cu e no ta stroba su meta.  
 Falta di material ta nada nobo

Segun directora di Maria College Sra. Roosje Garrido, ta haci falta di material na e scol specialmente e metodonan cu ta bastante bieu di casi aña 2004. ”Ultimo aña no tabata tin  un presupuesto pa sigui haya bukinan nobo anto pa motibo di esey nos ta trahando hopi cu copia. Nos deseo grandi ta pa nos haya un manera pa realmente haya material pasobra awendia, e muchanan ta lanta for di chikito caba cu cosnan moderno di color cu tur esey anto nos no kier nan keda atras. Mester cambia esaki mas pronto cu ta posibel segun Sra. Garrido ta splica Bon Dia sino nan no por capta e atencion di e muchanan optimalmente. Esaki seguramente ta costa hopi placa cual ta un problema grandi den enseñansa sinembargo varios scol ta conta Bon Dia cu nan no tin modo di haci cu no ta sigui pa dilanti anto keda positivo cu poco poco tur esaki ta bay wordo regla y un pa un e scolnan lo bini na beurt pa sigui cu renobacionnan cu tin mester y of materialnan cu falta cual no ta un asunto nobo den departamento di enseñansa na Aruba.