Durante dos siman, for di 11 te cu dia 20 di juni, Museo di Cas Tan Tin ta ricibiendo studiantenan di diferente scol rond Aruba cu actividadnan di Fiesta di San Juan, Dera Gai caminda nan ta experiencia cultura y tradicion di e Fiesta di Cosecha.
Departamento di Cultura conhuntamente cu Cuerpo di Bombero di Aruba y a organisa un programa educativo pa muchanan di 32 scol preparatorio y scol basico, for di 1ste te cu 3de klas, hobennan di Formacion Social tambe ta participa den esaki yudando cu e organisacion y guia di e muchanan durante nan yegada den busnan escolar.
Diamars ultimo tabata na beurt St. Anna School di Noord unda studiantenan a scucha e historianan tocante celebracion di San Juan expresa pa Sr. Jhon Fredy Montoya di Departamento di Cultura ken a pone nan baila y hasta participa den weganan relaciona cu e fiesta aki, Sr. Francis Toussaint di Cuerpo di Bombero a splica e muchanan tocante e tradicion di cende candela riba dia di San Juan, lo cual por ta peligroso pa hendenan, bestianan y medio ambiente.
Di su parti, director di Museo Cas Tan Tin, Richard Tromp, a expresa na redactor di Bon Dia Aruba cu ya caba un total di 3.606 mucha a asisti na e actividad aki e cual ta bay dura pa 8 dia y un cantidad di mas o menos 450 mucha ta bishita Museo Cas Tan Tin pa experencia cultura y tradicion di fiesta di cosecha.
Den grupo di entre 125 y 175 mucha, nan ta ser educa y informa tocante fiesta di cosecha, tradicion di baile, etc. Na final di evento, e muchanan cu a participa den weganan y demostracion di baile a haya un certificado.
