ORANJESTAD – Minister di Turismo, Salubridad y Deporte, sr. Dangui Oduber, a bisa cu deporte lo haya e atencion necesario y lo pone deporte bek como prioridad.
Pa 8 aña largo, e gobierno di AVP a neglisha deportistanan, deporte y complehonan deportivo por completo. Ta un cantidad di compleho deportivo cu ta resorta bou maneho di Fundacion Facilidadnan Deportivo ta den cay den otro y ta den mal estado. E ta un berguensa cu durante 8 aña no por a presenta un plan general di mantencion pa asina por mantene tur e complehonan deportivo na un nivel aceptabel.
Segun un comunicado di gobierno, Oduber su maneho di deporte ta dirigi riba stimula movecion den barionan, inverti den facilidadnan deportivo, pone iluminacion na veldnan y sin lubida e Proyecto di yerba artificial. Lo duna e deportista atencion y muy en special esunnan di alto rendimento. Lo stimula y pone fondo disponibel pa prepara atletanan pa olimpiada.
“Despues di 8 aña, porfin ta duna atencion na hopi cos cu a bay robes den deporte.” Como parti di maneho di Oduber, ta percura ta tur facilidad ta gosa di bon iluminacion. Asina aki Oduber a percura pa cambia tur e bombionan y pone nobo na veld di Duracell y tambe pronto Kudawecha lo ta na turno.
Oduber ta convenci cu na momento cu duna atencion na e facilidadnan esaki lo stimula nos hobennan pa practica mas deporte. Porfin Oduber ta mira luz na horizonte den e caso di Lotto pa Deporte, y pronto lo tin control bek pa por haci hopi mas cu e fondonan aki.
Unabes esaki ta e caso, por spera cambionan drastico den deporte, caminda Oduber porfin por cuminsa ehecuta su maneho y vision pa cu deporte.
