Varios negoshi di apartamento operando riba tereno erpacht

Segun informacion obteni for di Kadaster, e terenonan riba e strip di Malmok tur ta erfpacht. Bon Dia Aruba a logra haya algun di e edificionan unda cu ta operando como hotel of apartamento, y a haya informacion cu ta trata di terenonan erfpacht.

Si tira un bista riba e ruta y riba e mapa adhunto, ta mira marca unda tur tin apartamentonan ta opera. Locual ta resalta ta cu doñonan di e diferente terenonan ta na nomber di un persona (doño) of tin cu ta na nomber di compania, manera cu ta e caso cu e boutique hotel Ocean Z. E funcionario na Kadaster a sigura Bon Dia Aruba cu no tin tereno riba e strip cu tin cambio di destinacion pa uno comercial y cu tur ta erfpacht.

Segun informacion obteni for di e abogado J. Croes cu ta representa Ocean Z, tin riba 20 edificio den e bario cu ta opera como comercial sin e permisonan pa esaki. Informacion cu nan tambe a ricibi for di Kadaster y DIP. E informacion aki nan a presenta na corte tambe mirando e situacion cu Ocean Z ta canando caminda pa haya permiso.

Segun abogado Sra. Croes, ta mustra cu hues no a tene esaki na consideracion y no ta cla tampoco kico lo wordo haci den henter e situacionnan di permiso di e otro edificionan cu si ta operando. Sra. Croes a bisa cu nan a wordo informa cu antes gobierno no tabata estricto, y no tabata controla riba esaki manera debe ser, y cu awo si ta e caso cu tin miho control tumando luga.

Si mira e manera cu e cosnan a cana, por pone bo pensa cu ta miho Ocean Z no a pone borchi promocionando nan boutique hotel, kisas nan tambe por a sigui opera sin permiso manera e hopi otronan, pa falta di control d banda di gobierno.

Algun di e luganan cu a logra controla na Kadaster ta Vistalmar Ocean View appartments, Aruba Beach Villas, Sailboard Vacations y diferente cas na huur temporalmente cu ta obtenibel online a base di informacion di e abogado Croes.  Tin mas edificio cu a controla den e area, segun e mapa, pero tur e nombernan no ta cla mirando cu den e sistema di Kadaster nan ta registra bou di nomber di e doño. E luganan ariba menciona por haya tur detaye di nan riba Tripadvisor, Bookings.com, Visit Aruba.com y algun tin nan mesun website di promocion.

Anterior

 Por corda articulo publica cu Ocean Z a haya su mes den confrontacion cu diferente bisiña cu finalmente a lanta un grupo y a bay corte contra e compania Zissu Properties cu ta doño di Ocean Z. E propietario Eva Zissu a indica durante conferencia di prensa cu e no tabata sa di e situacion rond di dje, cu hopi otro apartamento ta operando sin permiso. Y si e tabata sa di e situacion lo no a opta pa busca pa cambio di destinacion y lo a keda cu su cas.