Durante su prome conferencia di prensa di 2021, un aña di eleccion na Aruba, minister di Husticia Andin Bikker a informa cu lo enfoca pa bin dilanti cu un serie di ley nobo.

Sinembargo pa atende cu e agenda legislativo aki di parti di ministerio di Husticia cu ta inclui varios iniciativa of propuesta di ley, mester reforsa e departamento huridico pa elabora riba nan di un forma mas diligente, ya cu ta existi un scarsedad di hurista den Directie Wetgeving en Juridische Zaken.

Tur e leynan cu nan ta bin promulgando durante e ultimo tempo di e pandemia di Covid a trece un reto cune. Pero tambe dor di e situacion relaciona cu Venezuela, tur e leynan ey cu nan mester bin cune a demanda hopi esfuerso for di un grupo limita di persona cu ta esunnan cu ta bin trahado riba dje. E ta haya cu keto bay e leynan ta yegando Parlamento y tur ta wordo atendi cune. “Pero nos no bay mas lihe cu lihe,” segun e mandatario.

E mandatario a referi cu actualmente e departamento aki ta conta cu ‘nuebe hurista y mey’ pa skirbi ley. El mey hurista ey ta e mesun mandatario cu a base di su experiencia amplio como ex-parlamentario y como hurista ta uni esfuerso pa percura bin cu e proposicion di leynan pa cana su caminda legal te cu Parlamento.

Pronto e departamento aki lo wordo reforsa cu 20 hurista cu actualmente ta studiando pa bira experto con pa concipia e leynan. Pero na luna di juni venidero, nan lo bay haya e grupo di hurista adicional aki.

Agenda legislativo

E agenda legislativo di parti di ministerio di Husticia ta inclui entre otro un ley cu ta percura pa e doño di negoshi por reorganisa nan debenan. Y otro pareu cune ta e ley cu tin di haci pa e comerciante por haya ayudo di instancia di gobierno pa e comerciante por sanea su situacion financiero pa consecuencia di e virus.

E mandatario ta considera e ley aki importante, ya cu tin varios ciudadano den e tereno aki cu a wordo afecta nan entrada severamente. Y otronan cu ta depende di e fuente di empleo aki pa no perde nan trabao.

Igualmente nan lo bin cu un ley cu ta busca proteha nos trahadonan den frontline, entre otro personal di brandweer y polis, kendenan durante e pandemia nan a bira victima di cierto atake for di ciudadanonan.

Minister Bikker lo bin cu un propuesta di ley pa percura –si ta posibel– pa yega na un castigo, ya sea alternativo pa e persona cu ta atenta contra e trahadonan aki. E mandatario a indica cu e ley aki lo ta un prevencion y un señal pa esnan cu tin un mal accion contra e trahadonan den frontlines.

Otro ley nobo cu na mei lo wordo introduci na Hulanda tin di haci pa reorganisa e sistema di libertad condicional. Igualmente nan ta trahando riba un ley hopi singular cu tin di haci cu persona cu ta sufri di trastorno mental. Hendenan cu debi na nan situacion mental nan ta cuminsa acumula cantidad di animal, causando molester grandi den nan bisindario. Pero tambe un situacion cu ta afecta salubridad publico. Ya caba nos autoridadnan a wordo confronta cu diferente casonan di persona cu trastorno mental of psicologico cu ta wordo haya cu 25 cacho den nan cas.

E instancia concerni mester atende e asunto aki a base di kehonan di e bisiñanan. El a splica cu ya caba diferente pais manera Merca y Canada tin leynan specifico pa cu e problema aki.

Ministerio di Husticia ta concipiando un decreto gubernamental pa atende specificamente cu e problema aki. Tambe lo bin cu un ley pa atende e persona ambulante cu tin trastorno mental den general pa evita cu nan lo por yega di comete un acto penal. Si e persona aki por ehempel no ta tuma su remedi regularmente causando cu e por bay den un fase di descontrol, autoridadnan por haya un ordo di corte pa actua.