Diferente keho penal a keda entrega pa entre otro difamacion, incitacion pa odio, y instigacion contra e medio di comunicacion 24ora door di acusacionnan falso y tambe contra funcionarionan di Guarda Nos Costa.

Dia 10 di juni ultimo a bira conoci e caso di un persona di nacionalidad Venezolano cu tabata deteni na Guarda Nos Costa (GNC). Den e proceso di su liberacion a keda graba un video cu a bay viral no solamente na nivel local sino na nivel internacional.

Hechonan di e caso

Maykol Chavez a drenta legalmente na Aruba dia 11 di februari di 2019 caminda el a pidi proteccion di refugiado (asilo) cerca e funcionario di migracion na aeropuerto. El a yena un formulario di tres blachi solicitando e proteccion, cu segun informacion concreto, ainda e prome peticion ta den sistema di DIMAS.

For di e dia ey, Chavez tabata wardando un contesta di DIMAS tocante su peticion pa proteccion di refugiado.

Dia 10 di december di aña 2021, Chavez a bolbe pidi asilo pa motibo cu e no a haya contesta riba e prome peticion di 2019.

Dia 25 di mei di aña 2022, Chavez, a keda deteni di manera ilegal. Despues 9 di juni ultimo, hues di Corte di Prome Instancia, M.E Brown de Haseth a duna libertad na Chavez di manera inmediato. Hues su decision tabata bisa: “verstaat dat verzoeker, voor zover hij nog in ophouding is, onmiddelliijk in vrijheid dient te worden gesteld”.

Sabiendo e decision di e honorabel hues De Haseth, Richard Kramers, director di Guarda Nos Costa no a laga Chavez den libertad, pero si a laga transport’e na un otro centro di detencion ubica na aeropuerto, unda a lag’e deteni contra un orden di libertad di un hues.

Diabierna 10 di juni, Guarda Nos Costa a presenta Chavez dilanti un hues comisario pa mantene su detencion pendiente di su deportacion. Honorabel hues A.J Martijn ta e hues comisario, kende a duna di conoce den su sentencia un biaha mas cu Chavez su detencion tabata ilegal, y a ordena su libertad di manera inmediato: “De rechter-commissaris acht de inbewaringstelling onrechtmatig en beveelt de onmiddellijke opheffing van de inbewaringstelling”. Tambe el a bisa cu e detencion di Chavez desde di dia 25 di mei tabata contra ley.

A hiba e caso aki na Corte di Prome Instancia, unda cu dia 6 di juli ultimo, Chavez a perde su caso contra su orden di deportacion. Pero na e momentonan aki, Chavez no ta den status pa wordo deporta pa motibo cu e tin procesonan legal andando na Aruba (Bezwaarfase – Beroepfase of Voorlopige voorziening), loke ta nifica cu aworaki Chavez tin status legal na Aruba y wardando su procesonan hudicial.

Di otro banda, dos periodista di medio di comunicacion 24ora, esta Nelson ‘Speed’ Andrade y Patrick Paskel, den nan programa ‘Enfoke’ a acusa directamente e abogado di Chavez, Maritza Boyce di sconde un persona “ilegal” y cu no ta integro. Structuralmente nan a menciona den e programa Enfoke cu cada biaha cu abogado Boyce perde un caso nan lo bisa pueblo y lo duna un mal recomendacion pa ningun hende bay busca su servicio como abogado. Tambe nan a pidi publicamente pa pueblo di Aruba haci siguimento (opsporings) y yama Polis pa nan captura Chavez y su mama, cu segun e dos periodista aki, ta ilegal na Aruba.

Igualmente, nan tambe a señala den e programa Enfoke cu casa di e periodista di Bon Dia Aruba cu a graba e video na Guarda Nos Costa a bay Warda di Polis di Wayaca hunto cu abogado Boyce – kende ta representa Chavez – pa asina entrega un keho penal contra 24ora. “Un afirmacion totalmente falso y yen di fantasia di e periodista. Un tiki mas mi mes a hera kere e periodista Paskel,” e casa di e periodista di Bon Dia Aruba a declara na redactor, agregando cu nan como ‘periodistanan’ conoci no a cumpli cu un di e principionan basico di periodismo, cual ta “hoor en wede hoor”; pa puntra su persona si ta berdad cu e tabata den un pickup cu abogado Boyce e dia ey.

Nan a comete un eror periodistico di revela indirectamente nan fuente na momento cu nan a sigura cu nan tin e video beeld interno di GNC y rapportnan oficial (mutatie) di e dia cu e video a ser graba na GNC, dia 10 di juni ultimo. Den e caso aki solamente dos persona tin autorisacion di duna e video beeld, cu ta director di GNC Richard Kramers y Minister di Husticia Rocco Tjon. E video beeld aki ta forma parti di un investigacion penal cu ta andando contra Kramers na e momentonan aki.

Bon Dia Aruba a tuma contacto cu minister Tjon pa puntra si su persona ta esun cu a duna GNC autorisacion pa comparti cu e medio di comunicacion 24ora e video beeld interno di GNC y rapportnan oficial cu ta propiedad di Gobierno di Aruba, y cu ta Dienst Geheim, na unda cu a keda graba henter e incidente cu a sucede e dia ey cu Chavez na momento di su liberacion, mirando cu tin un investigacion penal andando di wederrechtelijke vrijheidsberoving y di maltrato contra e director Kramers y contra e tres funcionario di nomber: Elvis Perez, Dayton Phillip y Melvin Ras. Tocante esaki, minister Tjon ta contesta na redactor di Bon Dia Aruba cu e no ta mete su mes den ningun operacion di departamento cu ta cay bao di dje y a sigura cu e no a duna autorisacion na director di GNC pa comparti ningun video y rapport geheim na 24ora den e caso specifico aki.

Tambe redactor di Bon Dia Aruba a tuma contacto cu director Kramers varios biaha pa e duna su banda di medaya. Na final di dia e ta responsabel como director di e departamento aki, manera minister Tjon a contesta na Bon Dia Aruba, pero te ciere di edicion, redactor aki no a haya ningun contesta.

Segun informacion obteni, e tabata cu fuera di Aruba di biahe cu vakantie. Bon Dia Aruba lo sigui purba di haya un contesta.

No solamente aworaki tin un investigacion penal contra director Kramers, pero tambe Veiligheidsdienst Aruba (VDA) a cuminsa un investigacion specificamente riba e rapportnan oficial y e video beeld cu a wordo comparti cu 24ora y e programa Enfoke, segun e mesun Patrick Paskel y Nelson Andrade a bisa cu un siguransa cu nan lo saca e video beeldnan den corte.

A bira conoci cu ayera den oranan di mainta, otro keho oficial di un ciudadano di nomber Lucio Thijzen a wordo entrega na Recherche di San Nicolas contra e dos periodistanan aki pa difamacion, incitacion pa odio y instigacion den na programa Enfoke, unda oficialmente a keda confirma cu esaki ta e di cuatro keho penal cu e dos periodista aki tin den nan contra den menos di dos luna, segun Bon Dia Aruba por a confirma.