Directiva di AMAA – Asociacion di Musico y Artista Arubano – ultimamente a haya varios keho cu tin musiconan di exterior ta traha sin permiso di trabao na diferente establecimento di horeca, esta hotel, restaurant, lounge y discoteca.
Directiva di AMAA ta determina pa caba of en todo caso minimalisa e fenomeno aki. Cu e meta ey directiva a reuni ultimamente cu Warda Nos Costa, pa pone nan na haltura di e problema existente y pidi nan cooperacion pa pone un fin na e practica ariba menciona.
Hefe di Warda Nos Costa a duna su palabracion cu Warda Nos Costa lo actua ora cu nan haya notificacion di AMAA cu tin un of mas musico of otro artista trahando sin e permisonan necesario. Musiconan y otro artistanan di exterior trahando sin e permisonan necesario, no solamente ta un competencia inhusto pa nos artistanan local door di nan tarifanan hopi abao,pero nan y e doño(nan) di e empresa cu ta duna nan trabao, ta burla di y ta viola nos leynan y fuera di esey no ta paga niun depchi na belasting.
AMAA lo pone tambe e departamento cu mester impone multa, esta DIMAS, na haltura, pa asina esunnan cu ta comete tipo di infraccionnan asina contra ley, wordo sanciona cu multanan corespondiente. Directiva di AMAA ta pidi cooperacion di tur musico y artista pa pone AMAA na haltura di e practicanan ariba menciona. Na su turno directiva lo denuncia esaki na Warda Nos Costa pa nan por tuma e pasonan necesario.
Por yama e siguiente miembronan di directiva: Sra. Maybelinne Arends 5821234, Sra. Nicole Booi 7347370, Sr. Victor Camacho 5936333, Sr. Serghio Jansen 5920565, Sr. Victor Mathilda 5939559, Sr. Sergio Tjie-A-Loi 6627029.
Tambe por notifica AMAA via email: amaaruba2016@gmail.com
Directiva di AMAA ta spera cu esaki por sirbi como un advertencia serio pa e empresanan cu ta emplea of tin idea di emplea musiconan y otro artistanan di exterior sin e permisonan necesario. Musiconan y otro artistanan local corda cu union ta forsa.
