Siman pasa a tuma luga e di dos German Energy Conference na Aruba, na unda cu varios inversionista internacional hopi interesa den Aruba a participa. Esaki ta nifica desaroyo y oportunidadnan grandi y nobo pa Aruba. Durante siman, Prome Minister Evelyn Wever-Croes a reuni cu varios inversionista cu a participa na e conferencia.
Segun un comunicado di prensa, Gobierno di Aruba aña pasa a wordo acerca pa Camara di Comercio di Alemania cu e peticion pa organisa un mision comercial na Aruba riba e tereno di energia. Esaki ta e di dos aña consecutivo cu nan ta bin cu un grupo grandi di inversionista cu interes den Aruba, na unda cu nan por a intercambia cu nos inversionistanan local. Mas di 100 persona a asisti na e conferencia aki cu ta brinda oportunidad nobo pa Aruba riba tereno di economia y di energia, segun e comunicado.
“Camara di Comercio di Alemania a keda hopi contento y agradecido cu e sosten di Gobierno di Aruba pa e Conferencia di Energia y nan bishita na Aruba. Mi a reuni cu varios inversionista y varios idea hopi interesante pa Aruba a wordo discuti. Inversionistanan ta hopi interesa den Aruba. Esaki sin duda ta brinda Aruba desaroyo y oportunidadnan nobo”, Wever-Croes a duna di conoce.
