“Autoridadnan di Estado ta complice”, Lottie Cunningham, presidente di Centro por la Justicia y Derechos Humanos de la Costa Atlantico de Nicaragua (CEJUDHCAN) a afirma dianan despues cu un grupo di colono a drenta violentamente den un comunidad di e selva Nicaraguense y a mata 4 indigena, 2 a keda herida y a kima 12 di nan ranchonan.
Ta e prome masacre di aña, pero di diesun di un guera largo di desplasamento cu e colono ta sostene contra e indigenanan cu ta biba na e teritorio cu ta pertenece na nan desde centenares di aña y cu un ley special a duna pa nan posesion y administracion. Ta un guera den silencio di cual poco hende na Nicaragua ta papia.
Dia 29 di januari di aña ultimo, 80 colono arma a ataca un grupo di indigena mayagna mientras nan tabata realisa trabounan di caza y piscamento na Reserva di Biosfera Bosawas, na Caribe Nicaraguense, despues nan a drenta den e poblado di Alal na unda a kima 12 cas y a terorisa su poblacion.
12mil indigena mayagna ta biba den poblacion aki, distribui den 23 comunidad. Na Alal, den e comunidad ataca ta biba 800 persona.
“Di e 304 comunidad indigena, 270 a haci denuncia di e situacion grave cu nan ta biba”, e defensor di derechonan humano ta señala. “Hende local no tin e capacidad pa resolve ningun conflicto cu terceros, ta responsabilidad di e Estado”.
“Colono den su mayoria ta ex-militar cu tin apoyo di autoridadnan di gobierno di manera clientelar y nan ta actua violentamente pa extende nan presencia y ocupa e teranan indigena”, Cunningham a denuncia.
A pesar di e atakenan continuo di colono, e indigenanan, huerfano di proteccion di estado, a desaroya un capacidad chikito pa defende nan mes. “E comunidadnan no tin capacidad pa defende nan mes. Nan no ta organisa ni a haya entrenamento di e tipo ey. Si tabatin algun defensa, tabata espontaneo cu nan a haya temor den momentonan cu e violencia ta aumenta y nan ta usa nan armanan artesanal”.
