Un comerciante di Christchurch a declara su mes culpabel di comparti e transmision en bibo cu a wordo graba pa e asesino luna pasa, mientras el a cuminsa tira riba hende na dos moskee na New Zealand.
Philip Arps a declara su mes culpabel di dos cargo di distribucion di e video y lo keda cera te ora di su sentencia dia 14 di juni proximo. E ta enfrentando un castigo maximo di 14 aña di prizon.
Fiscal a acusa e homber di 44 aña di edad, di a manda e video na un persona desconoci, y instrui e persona ey pa pone un ‘punto di mira’ y añadi un conteo. Fiscal ta bisa cu el a manda e video despues na 30 asociado.
E tirado a monta un camera riba un helmet y a transmiti su atake en bibo riba Facebook. E video horibel, di 17 minuut largo, a wordo copia y mira ampliamente riba internet, hasta ora companianan tecnologico a core pa elimin’e.
Prome minister di New Zealand, Jacinda Ardern, e siman aki a bisa cu e tirado a uza rednan social den un forma sin precedente pa actua terorismo y odio.
Hefe di Censura di New Zealand, David Shanks, a prohibi tanto e video como un manifesto skirbi pa e supremacista blanco acusa di e atake, haciendo esaki ilegal pa mira, posee of distribui na New Zealand. Masha poco a lanta obhecion contra e video, pero hopi ta argumenta cu prohibi e manifesto pa contra derechonan di libertad di expresion.
Sikiera seis persona a ser acusa di distribui e video ilegalmente. Arps y un otro persona, un hoben di 18 aña, a wordo aresta na maart ultimo, mientras otro cuater no a ser teni bou custodia. E sospechoso di 18 aña ta acusa di comparti e video y un imagen di e moskee Al Noor, unda mas di 40 persona a perde nan bida, cu e palabranan ‘target acquired’. E lo presenta na corte dia 31 di juli, ora lo considera libertad bou fiansa cu monitor electronico.
E Australiano Brenton Tarrant, di 28 aña di edad, a ser acusa di 50 cargo di asesinato y 39 cargo di intento di asesinato den e atakenan. Su proximo audiencia den corte lo tuma luga dia 14 di juni proximo.
Ardern a anuncia e siman aki cu presidente Frances, Emmanuel Macron, como tambe su persona, lo tene un reunion na Paris proximo luna pa purba elimina actonan di violencia extremista y terorismo di ser mustra online.
Ardern a bisa cu hunto cu Macron, lo pidi lidernan mundial y ehecutivonan top di companianan tecnologico pa bay di acuerdo na un promesa yama e ‘Christchurch Call’. E no a revela detayenan di e promesa, bisando cu ainda ta desaroyando esaki.
