Bishita di Gobierno (2).JPG
– Bon Dia Aruba a topa cu varios departamento di gobierno cu tabata riba caya ayera revisando e dañonan cu a wordo causa door di e awasero torencial di diadomingo pasa.
 
Desde e momento cu e awasero a inicia diadomingo, segun Prome Minister Mike Eman ta splica Bon Dia Aruba, gobierno a cuminsa un operacion hunto cu Rampenbureau y tur otro stakeholders cu ta yuda den momentonan asina. DOW, Serlimar, Brandweer, Polis como tambe departamento di Salubridad Publico a bini hunto desde diadomingo haciendo trabaonan hopi dirigi na e necesidad di e inundacion. Segun esey a pasa, gobierno a bay over na e yudansa pa e limpiesa y tambe pa e asuntonan social. Manera ta conoci, hopi casnan a sufri daño y a perde hopi cos di balor manera stoof, cashi y diferente mueble. Hopi bes den e areanan cu ta conoci unda awa ta subi, e ciudadanonan ta haya tempo y aviso pa prepara anto subi e cosnan mas halto pero e biaha aki esey no tabata e caso. “P’esey nos a start un programa di accion hunto cu Rode Kruis caminda cu nos ta bishita e barionan, inventarisa e dañonan di esnan di menos recurso y yuda nan tambe pa yega bek na un cas, un cama, frishider, cashi, stoof of algo cu nan por a perde. Na mesun momento tambe yuda nan haci limpi, na Madiki como tambe Palm Beach cual a hay’e hopi duro. Den e dianan aki nos tin pensa di bay na tur e barionan cu a wordo afecta,” Prome Minister Eman ta splica.
 
Analisis
DOW a sinta cu e departamento cu ta planifica pa asina cuminsa entre otro midi e capacidad di e rooinan cu tin pa wak unda e problemanan a surgi pa por cuminsa analisa y bin cu proposicionnan nobo, cu un prijs su tras, pa presenta esaki na gobierno pa wak si por bini na algo pa mehora e fluho di awa y evita cu casnan ta yena cu awa. Segun director di DOW, den e barionan di Madiki, Palm Beach y Sero Biento, cual ta esunnan cu a sufri mas daño te aworaki, nan tarea ta pa yuda e habitantenan yega na un periodo di recuperacion mas corto. “Nos a pone nos ploegnan traha akiden pa haci curanan y casnan limpi. Nos a yuda carga mueblenan cu a wordo perdi pa deshaci di nan hunto cu Serlimar y EcoTech. Pa diabierna nos lo cuminsa traha riba e careteranan publico, corta yerba, mata unda mester pa ora nos bandona e luga nan ta den bon condicion,” Sr. Marlon Croes ta bisa.
 
 
 
 
Continuamente traha infrastructura nobo
Varios ciudadano ta comenta cu e situacion aki di infrastructura na Aruba no ta algo nobo. Esaki ta un problema cu ta andando pa decadanan y hopi hende ta cansa cu stagnacion di awa ta keda ripiti na e mesun areanan y awo te hasta na areanan nobo. Aunke cu Aruba no sa haya awasero torencial di e nivel aki tur aña, kico ta e plan pa por cuminsa soluciona e problema aki pa nos no mester ta papiando di dje ainda aki 10 pa 15 aña? Prome Minister ta bisa cu: “E ta hopi fastioso. E ta un situacion unda continuamente bo tin cu traha infrastructura nobo pasobra ta bin mas cas, mas edificio y unda cu bin un cas of edificio, e ta laga menos luga pa awa. Esaki ta haci cu continuamente mester wak con mester crea infrastructura nobo pa hiba e awa mas lihe posibel na e punto mas abao cu ta lama. Den e caso aki nos ta mira dos acercamento: pa crea canalnan adicional pa e awa por yega mas lihe anto kita loke ta den caminda tambe, pasobra tin biaha awa ta wordo stroba door di muraya grandi,” Prome Minister Eman ta splica Bon Dia Aruba. Pero na mesun momento tambe, gobierno tin un plan segun Eman, pa mira si den e partinan mas halto di Aruba nan por capta mas awa pasobra na un banda tambe, e ta un perdida di awa hopi valioso pa e agricultura y otro metanan importante manera cria. “Si nos por crea damnan mas grandi den e areanan mas halto di Aruba por ehempel na St. Cruz di unda e awa ta cuminsa bin abao, e ora ey nos por tambe kita algo di e peso cu e inundacionnan ta causa door di e cantidad di awa cu nos no por transporta asina rapido pa lama. Pero si nos por capta un parti di dje, cu reservoirnan tambe den centro di ciudad bao di parkeerplaats etcetera, e por haci un diferencia unda cu nos ta alivia e problema pero nos ta crea reservoirnan nobo di awa cual tambe ta importante,” Minister Eman ta splica.
 
70 milliliter di awa den cuater ora
E awasero cu a cay tabata uno cu nos no a wak den hopi tempo y segun Minister di Infrastructura,  ni con bon bo infrastructura ta bo no por verwerk e awa ey. Sin embargo despues di algun ora e awa a bay tog. “Esey kiermen cu e sistema ta funciona pasobra antes ora algo sosode, ta dos tres dia e awa ta keda para,” Minister Benny Sevinger ta bisa. Gobierno kier sigui adapta riba e sistema cu nan tin caba y pa cu esey, ingenieronan ta trahando riba un plan tanto pa Palm Beach como Madiki.