Varios persona, incluyendo e cabesante di e grupo nacionalista radical, Pegida, a keda aresta na Apeldoorn na e yegada nacional di Sinterklaas. Polis a bisa cu mayoria di e arestonan tabata hende kende a nenga di cumpli cu orden di bay den e area separa pa demostracion.
A hiba dies persona den custodia, segun Nu.nl. Nan tabata bisti den e disfraz mas comun di Zwarte Piet. E disfraz frecuentemente ta critica pasobra hende blanco ta bisti den makeup di cara preto, argumentando cu e apariencia ta pa significa ‘soot’ di e chimenea, y no un stereotipo racial.
Edwin Wagensveld tabata un di esunnan aresta. E lider di Pegida a lidera un protesta controversial contra moskee y reunionnan moslim na Hulanda, hopi biaha den un manera divisivo y antagonistico.
Polis a bisa cu maske algun di e oficialnan acusa di a haci e arestonan pa stop medionan di comunicacion di entrevista e manifestantenan, e realidad di e situacion ta mas simpel. “No a aresta e hendenan pasobra nan a papia cu prensa”, polis a declara. “Nos a stop nan den un forma ordena pasobra nan no a cumpli cu demanda di polis.”
Apart di un cantidad chikito di aresto no- violento, e evento a mantene un atmosfera trankil y placentero. Miles di persona tabata presente diasabra, unda Sinterklaas tabata planea pa yega via trein na stacion di Apeldoorn merdia.
E ciudad a pone un cantidad di medida di siguridad pa e evento, incluyendo acceso monitorea, codigo di conducta, y extra siguridad. A bisa tur persona presente na e celebracion cu nan lo mester pasa a traves di checkpoint di control, y lo stop y listra hende.
A pone tres sitio disponibel pa demostracion di gruponan organisa, incluyendo tres cual kier preserva e tradicion di cara preto di Zwarte Piet, hasta ora cu hopi gruponan di derecho humano a declara cu e caricaturanan racista mester ser reemplasa cu algo mas inclusivo di hende di tur rasa y nacionalidad.
Poster di activista anti-racismo Afriyie como Zwarte Piet na Den Haag.
Posternan mustrando e activista anti-discriminacion, Jerry Afriyie como Zwarte Piet a ser poni tur caminda na Den Haag diabierna anochi y diasabra mainta. E posternan a uza un manipulacion digital di un potret di Afriyie, convertiendo e den e caricatura racista contra cual el a lidera un campaña pa varios aña.
Centenares di poster tabata poni a lo largo di e ruta di e parada di Sinterklaas na Den Haag. Nan tabata pega na tienda y barconan den e haf, segun Omroep West.
E municipalidad a yuda retira e posternan, como tambe entrepreneurnan, personal di siguridad y residentenan, e ciudad a confirma.
Afriyie ta trahando cu e organisacion di protesta Kick Out Zwarte Piet. E grupo ta bisa cu e uzo di cara preto pa Zwarte Piet, hopi biaha cu peluca cu krul preto, lip cora grandi, renchi horea di oro, y comportamento bofon, ta un relica di e ‘minstrel show’ cu a tour Merca y Europa na fin di siglo 19.
