Dialuna den oranan di anochi, Gobierno a presenta den su conferencia di prensa alto comisario di Cuerpo Policial di Aruba, Vanessa Tjon-Kock ken a splica loke ta trata criminalidad den tempo di coronavirus.
Tjon Kock a trece dilanti cu den e temporada aki di crisis ta existi diferente fase di criminalidad. A ripara esaki di e cantidad di persona cu a wordo contagia, cu constantemente ta birando menos. Esaki ta pa motibo di e normanan nobo cu comunidad mester cuminsa usa, biba cune, pero semper ta keda un grado di criminalidad na Aruba.
Durante e crisis, Cuerpo di Polis a ripara cu a haya kiebro den casnan, edificionan y tambe ladronicia. Tjon Kock a resalta cu durante toque de queda, e personanan a keda paden den un cierto orario, pero esey no ta nifica cu criminalidad ta stop, pa motibo cu tin un desaroyo pa cu e crisis y automaticamente tin desaroyo pa loke ta trata criminalidad.
E delito di kiebro di cas, Tjon Kock a bisa cu na momento cu nan ta mira cu esaki a aumenta of esaki ta tumando cierto tipo di direccion, di parti di cuerpo policial nan ta adapta nan manera di trata e tipo di casonan aki.
Di loke ta trata criminalidad comun, el a expresa cu por ehemplo ladronicia por subi y esey por nifica cu pa comunidad y trabou di polis lo keda mesun cos, aplicando e reglanan di toque di queda y shelter in place, pero e atencion no ta wordo kita for di e tipo di delito aki.
Igualmente, el a splica cu nan a haya hopi atencion rib rednan social pa loke ta trata atraco. Esaki ta wordo considera como un delito caminda violencia ta tuma luga y cu tin un prioridad den cuerpo policial. Ademas di e proceso cu nan ta aplica pa cu esaki, el a menciona cu tambe tin basta prioridad y cu autoridad no ta descansa pa cu esaki.
