Durante un conferencia di prensa di diamars ultimo, alto comisario di Cuerpo di Polis, Vanessa Tjon Kock a trece dilanti kico ta nifica e adaptacion di e medidanan cu te ainda ta na vigor.
Di su parti, Tjon Kock a expresa cu “crisis no a caba”, pa motibo cu door di duna e noticia pa habri cierto negoshinan y sectornan e hende por pensa cu e situacion di coronavirus a pasa caba y nan por haya mas libertad y oportunidad. Pero manera DVG a indica caba, e crisis no lo termina di un manera hopi lihe.
Pa trabou di polis, Tjon Kock a bisa cu esaki ta nifica cu esaki ta “simplemente un adaptacion di orario” pa motibo cu nan trabou no lo cambia. Actuacion di polis no lo cambia, ni nan manera di traha door cu nan ley ta hancra den decreto ministerial. “Toque de queda ta keda toque de queda”, el a sigura.
Di loke ta trata e periodo cu a pasa, el a splica cu nan a haci diferente detencion principalmente den barionan caminda tin diferente delito cu a wordo cometi. Di esaki el a señala cu actuacion di polis lo keda di igual manera.
Di loke ta trata pa comunidad, Tjon Kock a comenta cu manera nan ta haya mas libertad personanan ta pensa cu na e momento ey nan ta bay ta mas ‘los’, lo haya mas oportunidad pa ta riba caya. Pero ora a duna permiso pa habri cierto luganan y sectornan, e control di polis tambe lo keda, pa via cu mester tuma na cuenta cu mas hende lo bay ta riba caya.
Asina mes, el a enfatisa cu comunidad mester compronde kico esaki ta nifica pa aglomeracion di hende, pa motibo cu ainda e hende por wordo contagia y no por lubida esey. “Nos ta bayendo den un direccion hopi positivo y esey no ta nifica cu nos no lo por contagia mas, pasobra e crisis no ta na su final ainda”, Tjon Kock a informa.
Tambe, el a trece dilanti cu caminda cu lo bin un ‘normal nobo’ cu ta nifica un situacion nobo cu ta bay dura basta luna. “Nos tur como Arubianonan y tur hende cu ta biba na Aruba mester adapta pa e situacion nobo, un normal cu no ta bay ta manera antes mas”, asina el a finalisa.
