Alto comisario di Cuerpo Policial di Aruba, Vanessa Tjon Kock durante un conferencia di prensa di dialuna ultimo a splica cu despues cu a kita e medida di toque de queda, cuerpo policial den 3 dia a enfrenta diferente incidentenan.
Tjon Kock a expresa cu durante e tres dia aki, nan a conta 20 accidente di cual den 6 di nan tabatin herido. Mayoria di nan tabata entre 9or di anochi cu 6or di mainta cu hopi uso di alcohol, hincamento cu a tuma luga, bringamento na gran scala, problemanan domestico, problemanan cu establecimento cu no kier tene nan mes na e orario stipula di 10or di anochi y asina tabatin otro incidentenan cu a tuma luga.
Tjon Kock a comenta cu nan duna e libertad y oportunidad pa hende por ta riba caya cu e implementacion di e ‘normal nobo’, pero cu comunidad mester ta consciente di e situacion na Aruba, cu no ta a keda mesun cos. Tambe tin cierto suplicanan cu a bin cune cu mester tene na cuenta, pa motibo cu ainda e frontera no a habri.
“Na e momentonan nos ta enfrentando unda tur hende kier ta riba caya, tur hende kier sali. Pero si esaki no ta bay coordina of controla, e ta bay sali completamente for di man” el a declara. Tambe a menciona cu e tarea di polis den esaki ta cu nan lo actua y segun e mes a sigura, ‘hende lo tuma na malo, pero nos tin cu haci nos trabou’. Comunidad no mester lubida cu nan tarea ta pa garantisa e siguridad y si nan tin cu garantis’e door di actua, nan lo tin cu haci esey tambe, pa motibo cu nan no por laga cu e situacion sali for di control.
El a pidi pa comunidad ta consciente, no solamente pa su comportamento, sino pa tambe uso di alcohol y pa tene na cuenta den trafico. E conducta den trafico, si e persona ta bebe, lag’e otro persona pa stuur pa no pone su persona, esun cu ta bay cune den auto y nan sernan keri den peliger.
