VanEps Kunneman VanDoorne otorga scriptie prijs na Aruba

Diahuebs 7 di september a otorga e VanEps Kunneman VanDoorne scriptie prijs na Aruba. E ganado e aña aki tabata Stacey Kransen. El a ricibi e premio, consistiendo di un certificado y un cheque, durante un ‘Thesis Award Night’ di Universidad di Aruba. Tur aña ta otorga e scriptie prijs pa e miho scriptie na final di estudio di studiantenan di ley di e universidad aki.

E aña aki e Facultad di Ley a nomina dos sriptie pa e VanEps Kunneman VanDoorne Scriptie prijs. E scriptie ganado a wordo scogi pa un comision di evaluacion, di cua tambe abogado Steffen Hagen, manager di e establecimento di VanEps Kunneman VanDorne na Aruba, a forma parti. Ora di scoge e scriptie ganado a tuma na consideracion diferente criterio, incluyendo formulacion di pregunta, originalidad y structura.

E scriptie ganado di Stacey Kransen cu e titulo ‘Un Tata tambe tin derecho’ ta dirigi riba e pregunta te na unda e derecho di tin contacto cu e tata cu no ta casa cu e mama y cu no tin autorisacion por wordo fortalece na beneficio di e yiu. Segun e comision di evaluacion, un scriptie cu relevancia tanto social como huridico. Ademas a elogia e scriptie pa motibo di su bon structura y consistencia. Pa conclui, e comision a menciona cu Kransen a logra tambe pa presenta solucionnan no huridico sin cu nan tabata improbabel of artificial.

Como organisacion caminda conocemento ta central, VanEps Kunneman VanDoorne ta duna hopi balor na enseñansa. Bon enseñansa ta crea oportunidat pa e generacionnan venidero den e sociedad Caribense den cua e oficina mes ta opera. E entrega anual di e VanEps Kunneman VanDoorne scriptie prijs tanto na Aruba como na Corsou ta forma un iniciativa pa sostene esey.