Den un par di potret cu e minister encarga cu Naturalesa Ursell Arends a publica riba su red social Facebook por mira con personanan a skirbi cu loke ta parce stift, riba piedranan grandi cu ta den naturalesa, un acto cu sigur no ta aceptable.
Riba su Facebook page, e mandatario a skirbi un post, “E siguiente imagennan a wordo comparti cu nos. Algo cu absolutamente no ta aceptabel! Nos tin cu encurasha turistanan pa respeta nos naturalesa. Tour guides, sea riba tera of lama, taxistanan, tur hende cu ta traha directamente cu turista, y si bo ta wak algo asina wordo haci tambe. Nos tur por duna un man pa preserva nos naturalesa. Stop stacking rocks and stop writing on them!”
Bon Dia Aruba tambe a tuma contacto cu minister Arends caminda el a sigura cu e tipo di actonan no ta tolerable pa loke ta trata naturalesa na Aruba. E potretnan a ser saca na Arashi pero no ta conoci si tin mas piedranan cu tambe a ser pinta igualmente cu stift manera esakinan.
“E idea ta pa trece mas conscientisacion den comunidad, cu companianan di tours y cu e mesun turistanan pa no sostene ni comete actonan asina, vandalismo contra naturalesa esaki ta,” e mandatario a afirma.
E yamada ta na cualkier ciudadano of turista pa tene den consideracion cu por ser considera como “custumber” na cierto paisnan pero na final di dia por tin un impacto ambiental negativo y ta haci referencia na un necesidad di expresa nan mes cu un contenido bashi, ademas di afecta e paisahe.
Riba rednan social e comentario di usuarionan no a tarda pa yega, caminda a solicita na tur hende cu ta traha cu turistanan y na hotelnan pa cuminsa duna informacion: “Nos mester un solo nivel pa informa di nos luganan y nan historia, nos parhanan etc., pa nos por cuida y proteha loke nos tin ainda, por ehemplo na otro paisnan, Colombia, tur guia ta riba nivel pa duna informacion.”
Mesun manera, a comenta cu mester bin un control severo manera security, pa pone boet y asina sa cu pa esaki tin consecuencianan: “Alto Vista mes hende no por ni hiba un bela y sinta reflexiona, tanto borchi pafo y toch e hendenan no ta worry mes, ta ora pa actua.”
