Entre e proyectonan cu Stichting Monumenten Fonds Aruba (SMFA) a presenta den cuadro di ‘fast track’ ta aparece e edificio monumental di ex Botica Aruba. Tin un desaroyo nobo relaciona cu e joya arkitectonico aki, situa patras di caya grandi den pleno curason di Oranjestad.
Recientemente a tuma luga un destaho publico, caminda e proyecto di renobacion di ex Botica Aruba a keda otorga na Van Kessel Havenbouw N.V. Te ainda no tin movecion, ya cu SMFA ta wardando riba e vergunning di Monumenten Bureau Aruba pa cuminsa cu e trabao aki.
Ta asina cu SMFA tabatin un total di cuater destaho, tres di mantencion y esun mas grandi di renobacion di ex Botica Aruba. Ainda falta e destaho di esun di mantencion pa Lighthouse cu tambe a wordo inclui den e lista di proyectonan di fast track cu lo tuma luga na final di e luna aki.
Ya caba SMFA tabatin varios proyecto na caminda ora cu Covid a dal nos, y nan a selecta un par di nan, entre nan edificio di ex Botica Aruba, y nan a presenta na e comision di fast track, caminda nan a pidi gobierno cooperacion pa varios proyecto.
Entre nan ta aparece tambe e tanki di awa na Kibaima cu ya caba e matutino aki a referi na e bunita proyecto aki cu ta inclui un parti di agricultura. Nan a cuminsa traha riba e estudio cu expertonan local pa bin cu evaluacion di e construccion mes y factibilidad di dje. Tambe nan a traha riba estudio cu ayudo di BOEi foundation cu tin experiencia riba tereno di herencia industrial na Hulanda.
Igualmente Imeldahof Convent cual nan ta mira pa e bira un hotel scol, manera esun di Corsou, esta Herm Klooster hotel (Hotel’t Kloster). E ta un tipo di boutique hotel, pero cu sumo respet pa nan pasado religioso, manera directora di SMFA, Anne Witsenburg a yega di declara na e matutino aki.
