Den un carta contestando pregunta tocante e caso cu Aruba y Corsou tin andando pa loke ta trata e ley di matrimonio di mesun sexo, Van Huffelen a reitera cu pa awo, Hulanda no por obliga e islanan haci e cambio.
E carta en cuestion ta informa lo siguiente;
“Na e persona concerni,
Cu hopi interes, mi a lesa bo carta, pa cual mi ta duna bo persona danki. Den e carta aki, lo mi provee un respuesta general na e preguntanan cu bo persona a trece dilanti. Pa cuminsa, mi lo provee un clarificacion riba Artikel artikel 43 di Statuut voor het Koninkrijk der Nederlanden (na cual lo referi for di awo como “Statuut”).
Manera mi a indica anteriormente, mi ta lamenta profundamente cu casa cu e pareha di bo escogencia no ta posibel tur caminda den Reino. Sinembargo, e status autonomo di e 4 paisnan dentro di e Reino por causa diferencianan. Artikel 43, paragraaf 1 di e Statuut ta declara cu cada pais ta responsabel pa realisa derechonan humano fundamental y libertadnan, certidumbre legal y bon gobernacion. E Reino ta hunga un rol solamente ora cu un pais no por cumpli cu e obhetivonan aki riba su mes. E fracaso di e curpa nacional no ta un causa inmediato pa e intervencion di Reino. Esaki mester ta un situacion unda e pais mes no por remedia un situacion cu ta inaceptabel.
Mirando e desaroyonan recien, considerando e procedencianan legal cu ta andando na Corte Supremo y e iniciativa legislativo entrega, mi ta kere cu esaki ta un rekisito sumamente halto na cual actualmente no ta cumpli.
Claramente, tambe tin obligacionnan di e tratado na cual e paisnan dentro di e Reino ta mara. Manera a indica pa e hurisprudencia di e Corte Europeo di Derechonan Humano, si e estadonan no habri matrimonio di mesun sexo, nan tin e obligacion positivo di provee un alternativa completo y ancra den ley. Aruba a tuma pasonan inicial den e area aki. Mi lo sigui encurasha Aruba pa ofrece e alternativa comprensivo aki.
Tambe bo persona a trece dilanti varios pregunta tocante e contactonan cu mi tabatin na Aruba pa loke ta trata Senador Dittrich. Pa esaki, mi ta referi na e carta di mi persona dirigi na e Senado, indicando cu mi tabatin varios dialogo cu e Prome Ministernan di e paisnan.
Por ultimo, mi kier expresa cu mi persona, claramente, lo sigui e procedencianan legal na Corte Supremo, cual lo cuminsa dia 10 di november. Adicionalmente, mi ta spera di por reuni cu bo persona durante un bishita subsecuente.”
