Comision fiho di Relacionnan di Reino a manda pa Secretario di Estado, Alexandra van Huffelen, un carta fecha 14 di februari 2024 pidiendo un carta di planificacion pa ehecucion di landspakket pa Aruba, Corsou y Sint Maarten pa 2024.
Ayera, contestando e carta aki, Van Huffelen a manda un carta pa Tweede Kamer na unda e ta splica cu e planificacion ta contene pa kwartaal carta-, regulacion-, rapport y otro documentonan, cu tambe a wordo manda pa Tweede Kamer. Van Huffelen a remarca cu solamente un parti di e documentonan ta disponible y cu e planificacion por cambia ainda.
E planning pa prome y di dos kwartaal ta inclui e agenda di ehecucion di landspakketnan di Aruba,Corsou y Sint Maarten no 1. pa 2024, ta inclui reforsa e rol coordinativo di BZK, inventarisacion di leynan y regulacion vigente pa Caribe Hulandes, discusion cu e Conseho Nacional di Hubentud tocante nombramento di un representante di hubentud pa Asuntonan di Caribe, actualisacion di resultadonan di conferencia di trabao di WolBES/FinBES.
E ta inclui tambe rapport di e bishita di Secretario di Estado na Aruba, Corsou y Sint Maarten den contexto di Acuerdo Mutuo di Cooperacion den Reformanan, e landspakketnan y fondonan di inversion.
E agenda di ehecucion pa prome y di dos kwartaal ta inclui rapportnan di ehecucion di landspakketnan di Aruba, Corsou y Sint Maarten No. 1 pa 2024, resumen di asignacionnan special di Caribe Hulandes, 47 y posiblemente 48 rapport di comision di progreso di Sint Maarten, rapport di evaluacion di politica di articulo 5 di e presupuesto di Relacionnan di Reino, actualisacion tocante reevaluacion di esfuersonan Hulandes den maneho di derecho di e paisnan Caribense di Reino y e plan di maneho pa evaluacion di politica di articulo 4 di e presupuesto di Relacionnan di Reino.
Pa loke ta e di tres kwartaal, e Secretario di Estado a informa cu esaki ta inclui e agenda di ehecucion di ladnspakketnan di Aruba, Corsou, Sint Maarten no. 3 pa 2024, rapport di ehecucion di landspakketnan di Aruba, Corsou y Sint Maarten No. 2 pa 2024
Cumpli of splica e leynan y regulacion cu ta ser formula pa Caribe Hulandes a largo plaso.
Planning pa kwartaal 4 ta inclui e agenda di ehecucion di landspakketnan no. 1 2025, rapport di ehecucion di landspakketnan no. 3 pa 2024 di Aruba, Corsou y Sint Maarten, progreso di acuerdonan gubernamental cu entidadnan publico di Sint Eustatius, Saba y Bonaire, y preferiblemente agendanan di ehecucion pa 2025.
E ta inclui tambe e situacion di programa di stage den Reino, situacion di maneho financiero, incluso cuentanan anual, di entidadnan publico Bonaire y Sint Eustatius, actualisacion di e situacion di mesa di clima di Bonaire, incluso presidente y structura di proceso.
Pa e di 4 kwartaal ta inclui tambe reaccion ariba e mocion di conseho insular di Bonaire tocante adaptacion di clima, hunto cu minister di Clima y Energia, reaccion riba e mocion tocante medionan financiero pa plan di adaptacion di clima pa Caribe Hulandes y financiamento internacional.
Ta inclui tambe reaccion di e gabinete riba rapport di investigacion tocante tarea y medionan di e islanan, incluso e mocion diVan den Berg y Wuite tocante un plan di maneho pa mas control riba asignacionnan special di otro ministerionan y pa haci asignacionnan special un proceso structural.
Den kwartaal 4 ta trata tambe e reaccion riba proposicionnan di Dialogo Central di Bonaire tocante minimo social, hunto cu minister di Politica di Pobresa, Participacion y Pensioen, reaccion riba mocion tocante fortalecemento di ayudo mutuo entre e paisnan den Reino y situacion di herencia di 250 aña di Prome Saludo riba 16 di november 2026.
