Secretario di estado Hulandes pa Relacionnan di Reino, Alexandra van Huffelen ta acepta e rechaso di gobiernonan di Aruba, Corsou y Sint Maarten pa habri matrimonio pa parehanan di mesun sexo.
Segun un relato den portal online Curasoleño, CuraçaoChronicle, Van Huffelen ayera a skirbi un respuesta na Senador Dittrich di partido D66, den cual el a bisa: “Durante ultimo lunanan, mi a tene discusionnan riba e asunto aki cu prome ministernan di e paisnan Caribense. Maske mayoria di e combersacionnan tabata constructivo y empatico, na e momento aki, no tin suficiente boluntad pa habri matrimonio pa pareha di mesun sexo. Esaki ta lamentable, pero considerando e autonomia di e paisnan, mi opcionnan pa actua ta limita.”
E Secretario di Estado ta destaca cu e Convencion Europeo riba Derechonan Humano y Libertadnan Fundamental ta aplica na tur pais den Reino. Sinembargo, aparentemente e no ta mira un motibo pa usa Articulo 43 – cu ta sigura e proteccion di derechonan humano como asunto di Reino – pa sigura cu e paisnan cumpli cu nan obligacionnan bao tratado. Aruba y Corsou a ricibi sentencia di corte, pero a apela contra e veredicto.
Parehanan di mesun sexo den paisnan CAS ta enfrenta varios problema practico, incluyendo dificultad pa obtene vivienda y seguro.
