Weekend ultimo, Secretario di Estado pa Relacionnan di Reino, Alexandra van Huffelen a dirigi un carta na Tweede Kamer den cual ta informa tocante e combersacionnan cu a hiba cu Aruba, Corsou y Sint Maarten tocante e refinanciamento di e prestamonan cu a incuri durante pandemia y cu ta caduca dia 10 di october proximo.
“Cu mi carta di dia 18 di juli ultimo, mi a informa e Kamer tocante e combersacionnan cu Aruba, Corsou y Sint Maarten tocante e refinanciamento di e prestamonan di Covid cu ta caduca dia 10 di october 2023. E suma di e prestamonan aki ta alcansa un total di 1,17mil miyon euro,” Van Huffelen ta bisa den su carta. “Mediante e carta aki, mi ta desea di informa tocante e estado di e situacion y tocante e oferta pa cada pais cu Conseho di Minister (di Reino) a dicidi riba dia 25 di augustus ultimo.”
Segun Van Huffelen, pa yega na e actual oferta a alcansa varios logro. A yega na un acuerdo tocante ENNIA, y den colaboracion estrecho cu Sint Maarten, a completa e analisis realisa pa Banco Central di Corsou y Sint Maarten (CBCS), loke ta permiti cu por ofrece un solucion na midi den e refinanciamento.
E analisis definitivo pa Corsou ainda no ta disponible, pa cual motibo no por a ahusta e oferta na e plannan di inversion cu ta desaroyando eynan, el a skirbi.
“Pa loke ta trata Aruba, ta importante pa Hulanda pa tin supervision financiero a traves di un Ley di Reino. Na e momento aki, ainda no a yega na un acuerdo administrativo riba esaki. Por lo tanto, na e momento aki nos ta ofrece e refinanciamento cu condicionnan menos faborable,” segun Van Huffelen.
“Den mi carta na e Kamer dia 18 di juli ultimo, tambe mi a anuncia un presupuesto complementario ocasional (ISB pa su siglanan na Hulandes,)” Van Huffelen ta skirbi, referiendo na e presupuesto di Hulanda. “Manera mi a splica den e carta ey, e presupuesto di 2023 ainda no ta contempla e refinanciamento debi cu ainda no tabatin acuerdo riba e refinanciamento aki. Por lo tanto, lamentablemente no tabata posible pa presenta e modificacion presupuestario na e Kamer antes. Minister di Finanzas ta bay manda e ISB aki na e Kamer, awo cu a tuma lugar e toma di decision den Conseho di Minister, asina cu ta posible. Mi ta pidi e Kamer di nobo pa trata e ISB aki cu urgencia despues di ricibie.”
Oferta di Hulanda
Conseho di Minister di Reino ya a constata aña pasa cu, mirando e magnitud di e prestamo y e recuperacion necesario di finanzas publico, lo no ta realistico pa spera cu lo ta posible haci e pago (total) na final di e plaso. Por lo tanto, gobierno di Hulanda a dicidi na comienso di e aña aki pa ofrece e paisnan un refinanciamento completo, segun e carta.
E interes di e prestamo ta depende di e tasa cu Hulanda ta paga pa su mes, y ta determina mas dilanti den funcion si ta cumpli cu e condicionnan specifico pa cada pais of no, ya cu e riesgo pa Hulanda den e prestamonan ta aumenta si un pais no ta cumpli cu e condicionnan aki.
Cu e meta pa aumenta e resiliencia economico di e paisnan, a duna oportunidad pa elabora un Marco Economico Plurianual (MEK) cu ta inclui inversion y reforma, entre otro. Pa e refinanciamento, ta aplica e condicion general di un analisis independiente di e refinanciamento pa determina e capacidad di pago di e pais. E analisis aki tambe mester duna un bista di e evolucion di e quotanan di debe di e paisnan. Cu meta pa sostenibilidad di debe, esaki mester ta den e rango cu Fondo Monetario Internacional (IMF) ta conseha di entre 50% y 55% a largo plaso. Un MEK completamente analisa y confirma por duna lugar na un refinanciamento mas personalisa door di duna espacio pa inversion y reforma, entre otro. E paisnan ainda no a probecha di e posibilidad aki.
Riba e tabel por mira e un resumen di e tarifa y plasonan cu ta propone.
Oferta pa Aruba
Despues, Van Huffelen ta splica e oferta cu a haci awo na cada pais. Pa Aruba, Van Huffelen ta indica cu di acuerdo cu e mocion presenta pa miembronan di Tweede Kamer, Kamminga y Van den Berg, e condicion pa Aruba por obtene un tasa di interes abao ta pa logra un acuerdo tocante un ley di reino den cual ta establece supervision financiero di manera sostenible. Esaki ta debi na e hecho cu un ley di reino ta e unico instrumento cu no por wordo modifica unilateralmente pa Aruba. “Despues di consulta, gobierno di Aruba ta parce di ta dispuesto pa considera e uso di un ley di reino pa supervision financiero,” segun e carta. “Actualmente, Hulanda ainda no a ricibi un propuesta di Aruba ni a yega na un acuerdo administrativo riba un ley di Reino. Pa e motibo aki, ta ofrece e refinanciamento di e prestamo di 500,3 miyon euro (Afl. 915.5 miyon) cu un tasa di interes mas halto di 6 pa 8%. Ademas, nos ta compronde cu Aruba ta den combersacion cu IMF pa presenta pronto un analisis independiente di e refinanciamento. Sin embargo, ainda no a completa esaki, y por lo tanto, na e momento aki, ta haci e oferta a base di un prestamo anual cu plaso di 20 aña.”
