Despues cu parlamentario di VVD den Tweede Kamer, Roelien Kamminga a entrega un mocion siman pasa relaciona cu e hecho cu Aruba no a cumpli cu e condicion pa introduci un ley di Reino pa supervision financiero, Secretario di Estado pa Relacionnan di Reino, Alexandra van Huffelen a duna comentario na medionan di comunicacion local.
Kamminga y Joba van den Berg (CDA) a entrega un mocion, cu tabata un accion pa sigura cu Aruba lo no haya extension di e prestamo haci durante e crisis di Covid-19 a base di condicion faborable, interes abao, si gobierno di Aruba no ta dispuesto pa acepta e ley di Reino di supervision financiero. Tambe den e mocion ta pidi gobierno Hulandes pa maneha un interes mas halto segun mercado pa e prestamo tanten no tin un ley di Reino pa supervision financiero vigente, “y si den e periodo venidero lo tin paso significativo tuma den direccion di e entrada na vigor di tal, refinancia e prestamonan solamente a corto plaso cu un porcentahe di interes cu ta pas cu e situacion cu ta en todo caso mas halto cu e interes bao di condicion faborable.”
Papiando cu portal online NoticiaCla, Van Huffelen a indica cu e diferencia di opinion entre Aruba y Hulanda pa loke ta supervision financiero ta cu Aruba kier usa un ley local, esta un landsverordening, mientras cu Hulanda ta insisti cu supervision financiero mester ta hancra den un ley di Reino.
Van Huffelen a bisa cu e ta bin Aruba na comienso di proximo luna y lo trata e tema aki cu gobierno.
