(AP) — Joran van der Sloot, e sospechoso principal den desaparicion di Natalee Holloway na Aruba na 2005, a cana na boei den un corte na Alabama ayera, mientras mayornan di Natalee tabata observa.
El a declara inocencia na cargonan cu el a purba di extorsiona placa for di mama di e adolescente desaparecido a cambio di revela unda pa haya restonan di su yiu muhe.
Maske e no ta den corte pa haci daño na Holloway, e cargonan di extorsion y fraude ta e unico crimen alega cu ta vincula e ciudadano Hulandes na desaparicion di Natalee riba e anochi final di un biahe di graduacion di scol secundario cu su compañeronan di klas. Natalee, 18, a ser mira pa ultimo biaha saliendo di un bar cu Van der Sloot, kende tabata studiante na Aruba, unda el a lanta.
Van der Sloot, kende awo tin 35 aña di edad, a ser extradita diahuebs for di Peru unda e ta cumpliendo un sentencia di 28 aña despues di a confesa di mata un muhe Peruano na 2010 – cinco aña riba e mesun dia despues di desaparicion di Holloway.
Mama, tata y ruman homber di Natalee tabata den corte ayera. Beth Holloway tabata observa Van der Sloot, pero no a mustra ningun emocion.
Van der Sloot, bistiendo jeans y un T-shirt blanco, a nenga di usa un interprete Hulandes cu a ofrece, bisando, “mi no ta kere ta necesario.” Durante e procedemento breve den corte, el a presenta un declaracion di inocencia a traves di su abogado y a contesta “si” ora a puntr’e si e ta compronde su derechonan.
Despues, Beth Holloway a brasa amigonan cu a yega pa ofrece sosten. El a nenga di duna comentario pafo di corte. Su vocero, George Seymore a bisa reporteronan cu mira Van der Sloot den corte tabata “espantoso pero na mes momento gratificante.”
E desaparicion misterioso a genera añas di cobertura den noticia y cantidad di podcast di crimen. A identifica Van der Sloot como sospechoso principal y a keda deteni hunto cu dos ruman Surnames algun siman despues di desaparicion di Holloway. Nunca a acusa ningun persona oficialmente den e caso.
Un hues a declara Holloway morto, pero nunca a haya su curpa.
Fiscalnan Mericano ta bisa cu na 2010, Van der Sloot a pidi Beth Holloway placa pa hib’e na e curpa di e hoben. Un hurado a acus’e e aña ey.
Na 2012, Van der Sloot a admiti di a mata Stephany Flores, 21, na Peru, kende tabata studiante di comercio di un famia prominente, na 2010.
Van der Sloot a casa cu un muhe Peruano na 2014 den un ceremonia na un prison di maximo seguridad. A cambie di prison como respuesta na reportahenan cu e tabatin privilegio manera television, acceso na internet y un celular, y acusacion cu el a menasa di mata un guardia di seguridad.
Peru a bay di acuerdo pa permiti Van der Sloot keda den custodia Mericano te cu e caso na Alabama conclui, incluyendo cualkier apelacion si e keda condena, segun un resolucion publica den registro federal Peruano. Autoridadnan Mericano a bay di acuerdo pa debolb’e na custodia Peruano despues, segun e resolucion.
