Un director nombra pa Hulanda lo mester asumi maneho di prison Pointe Blanche na St. Maarten, y mester kita maneho di e prison for di man di minister di Husticia di St. Maarten, segun miembro di Tweede Kamer, Chris van Dam di Partido Cristian Democrata CDA.
El a anuncia den un entrevista cu The Daily Herald cu e lo duna e mensahe aki durante tratamento di presupuesto 2021 di relacion di Reino den Tweede Kamer awe. “Den mi opinion, mester nombra un director den nomber di Hulanda asina cu ta posibel. No ta importa si ta un persona for di Hulanda of no, pero e mester reporta na Conseho di Minister di Reino y no na minister di Husticia di St. Maarten.”
St. Maarten no ta scuchando conseheronan den area di husticia, conseho di cumplimento di ley, y comite di progreso St. Maarten, Van Dam a nota. Ambos consehero a destaca un biaha tras otro cu e situacion na Pointe Blanche ta insostenibel, cu ta violando derechonan humano y cu urgentemente mester mehoracion.
St. Maarten a proba cu ta incapaz di maneha e prison efectivamente y garantisa derechonan humano na e facilidad. St. Maarten a yega e fondo di loke ta aceptabel. Biniendo di un famia Cristian, mi semper a siña cu con nos ta trata persona vulnerabel, viuda, viudo, huerfano, persona cu discapacidad mental y fisico, y prisoneronant a defini nos nivel di decencia”, Van Dam a bisa, agregando cu ‘ora bo manda un persona prison, mester ta un facilidad decente unda ta garantisa derechonan humano y e prisonero tin posibilidad di resocialisacion’.
Esaki no ta prome biaha cu Van Dam a trece dilanti e problema di situacion di detencion na St. Maarten. Den dos mocion anterior, cual a ser adopta pa Parlamento, el a pidi pa intervencion di gobierno Hulandes den cumplimento di ley na St. Maarten, particularmente e prison. A pesar di sosten amplio den Tweede Kamer, no ta cla te awo con gobierno Hulandes ta ehecutando e mocionnan.
Van Dam a nota cu Reino tin un rol den sigura derechonan humano, segun ta defini den Statuut.
