Compania Frances, Stanley Robotics, ta test su robot di valet autonomo pa algun aña caba, y e siman aki a cuminsa su prome servicio full-time na e aeropuerto Lyon-Saint-Exupéry na Francia.
E sistema ta lo siguiente: Cliente ta parkeer nan auto den hangar special, unda e vehiculo ta scan pa confirma nan marca y modelo. Despues, un robot –cu ta esencialmente un forklift autonomo – ta yega, deslisa un plataforma bou di e vehiculo, lanta esaki bay cune, y parkeer e auto.
E fabricante ta bisa cu su sistema ta uza espacio hopi mas eficientemente cu hende, unda cu por fit 50 porciento mas auto den e mesun area. Esaki ta den parti danki na e coremento precies di e robot, pero tambe pasobra e sistema ta tene cuenta na ki momento e clientenan lo bolbe. Esaki ta nifica cu e robot por parkeer autonan tres of cuater riba otro, pero saca esun corecto pa tin esaki cla pa ora su doño bolbe.
E robot ta uza e mismo sistema cu vehiculo autonomo sin chauffeur, y por scan su ambiente na cualkier momento, y reacciona na cualkier obstaculo.
E compania a test e tecnologia na Dusseldorf y aeropuerto Charles De Gaulle na Paris, y tin plan pa un otro test na London Gatwick e aña aki, pero su servicio na Lyon-Saint-Exupéry lo ta su prome servicio full-time. E robot no lo tuma parking di henter e aeropuerto sino unicamente un seccion, cubriendo 500 vak di parkeo, cu lo ricibi servicio di cuater robot, cu lo por parkeer y recupera te 200 auto cada dia.
