E siman aki un delegacion di e compania Mericano Valero ta reuni cu gobierno pa atende asuntonan pendiente. Esaki lo tuma luga despues cu minister presidente Sr. Mike Eman y Minister di Asunto di Energia, Sr. Mike de Meza a firma e acuerdo final cu Citgo y gobierno di Venezuela pa reapertura di refineria na San Nicolas.
Gobierno a yega di manifesta e boluntad di Valero di entrega e tereno y tur infrastructura cu nan tin riba dje, pa balor simbolico di 1 dollar. Esaki ta un echo historico pasobra despues di casi 100 aña di e industria aki riba nos isla, esaki ta e prome biaha cu Aruba lo bira doño di e refineria. Sinembargo e traspaso aki mester tuma luga ainda preto riba blanco riba un acuerdo final cu Valero Energy Corporation.
Trahadonan di Valero
Entre e asuntonan pendiente cu Valero ta aparece e situacion di e trahadonan cu ainda ta trahando pa e compania Mericano aki. Ta trata di un grupo di alrededor di 50 trahado afilia na e sindicato IOWUA cu ta pendiente pa firma un contracto colectivo (CAO) nobo pa tres aña. Considerando cu e ultimo CAO cu nan a firma di tres aña ta inclui un clausula di sucesion, IOWUA a yega di informa cu e compania nobo mester atende su mes na e condicionnan acorda aki.
Bon Dia a tuma contacto cu presidente di IOWUA, e sindicalista Sr. Boy Anthony kende a prefera di no duna comentario, ya cu nan tin un reunion pendiente pa mira con e situacion di e grupo di trahadonan cu ainda ta trahando cu Valero, ta para.
Despues cu miembronan di IOWUA a reuni cu e ministernan Mike Eman, Mike de Meza y Paul Croes y delegacion negociado di Aruba, riba acuerdo firma cu Citgo Petroleum Corporation, nan ta spera cu den e reunion cu Valero, nan lo por tende mas di dje, specialmente riba e situacion laboral di nan miembronan.
Ainda e sindicato aki ta pendiente di negosha salario y demas beneficionan di nan miembronan pa asina no bay atras riba loke nan a adkiri caba.
